.: Die Profeet Sagaria - 15 (Die Fontein van Reiniging)

Sunday, August 23, 2015

Die Profeet Sagaria - 15 (Die Fontein van Reiniging)

1. INLEIDING:

Ons gaan vanoggend kyk na Sagaria 13 en hierdie kort hoofstuk is baie nou verwant aan hoofstuk 12, beide chronologies en teologies. Op teologiese vlak, hanteer hoofstuk 13 die reiniging van die sonde wat in hoofstuk 12 bely is.

Hierdie twee hoofstukke word ook verbind deur dieselfde uitdrukking, nl. “daardie dag” kort-kort te gebruk - so bv. sien ons in 12:11 dat daar staan ~ Daardie dag sal daar in Jerusalem meer getreur word as wat daar oor Hadad-Rimmon getreur is in die Megiddovlakte. Hoofstuk 13 begin ook met die woorde, daardie dag. Dieselfde geld vir die uitdrukkings, koningshuis van Dawid (12:10 en 13:1).

Hierdie herhaling van woorde en uitdrukkings wys vir ons daarop dat hierdie twee hoofstukke nie net ’n eenheid vorm nie, maar dat dit ook oor dieselfde mense en tyd handel en chronologies dui dit daarop dat vergifnis en reiniging altyd volg op berou en belydenis - hierdie is dan ook die punt van 2 Kron.7:14 ~ …en my volk oor wie my Naam uitgeroep is, toon berou en bid en vra na my wil en draai terug van hulle bose weë af, sal Ek luister uit die hemel en hulle sonde vergewe en hulle land laat herstel.

2. SKRIFLESING:

Sag.13:1-9 ~ Daardie dag sal daar ’n fontein oopgemaak word om die koningshuis van Dawid en die inwoners van Jerusalem te reinig van hulle sonde en hulle vuilheid. ²Daardie dag, sê die Here die Almagtige, laat Ek die gedagtenis aan die afgode verdwyn uit die land. Daar sal nie meer aan hulle gedink word nie. Ek gaan ook die profete en die gees van onreinheid uit die land verwyder. ³Wanneer iemand nog profeet probeer wees, sal sy eie pa en ma sê: “Jy mag nie lewe nie, want jy praat leuens in die Naam van die Here.” So ’n man se eie pa en ma sal hom doodsteek omdat hy profeet probeer wees. ⁴Daardie dag sal elke profeet in die verleentheid wees met die gesigte wat hy as profeet sien, en hy sal nie meer harige profeteklere aantrek om met sy bedrog aan te gaan nie. ⁵Hy sal sê: “Ek is nie ’n profeet nie, ek werk op die lande, iemand het my verkoop toe ek nog jonk was. ⁶En as iemand vir die profeet sê: “Wat se wonde het jy dan op jou bors?” sal hy antwoord: “Iemand het my so geslaan in die huis van my vriende.” ⁷Kom, swaard, tref die herder in my diens, sê die Here die Almagtige, tref die man wat so na aan My is. Maak dood die herder, dat die skape uitmekaargejaag kan word. Ek sal self optree, ook teen die kleinstes onder hulle. ⁸Dwarsoor die land, sê die Here, sal twee derdes van hulle uitgeroei word en omkom. Daar sal net ’n derde van hulle oorbly in die land, ⁹en dié derde sal Ek met vuur louter soos silwer gelouter word. Ek sal hulle suiwer soos goud gesuiwer word. Hulle sal My aanroep, en Ek sal hulle gebede verhoor. Ek sal sê: “Hulle is my volk.” En hulle sal sê: “Die Here is ons God.”

3. DIE FONTEIN VAN REINIGING (vv.1-2):

Vers 1 begin met die uitdrukking, “daardie dag”. Watter dag is “daardie dag”? Dit is die dag waarop die finale oordeel sal plaasvind en God se uitverkorenes finaal gered en verheerlik sal word. En wat gebeur op daardie dag? Op …daardie dag sal daar ’n fontein oopgemaak word om die koningshuis van Dawid en die inwoners van Jerusalem te reinig van hulle sonde en hulle vuilheid.

Die woord “fontein” in v.1 verwys na ’n waterbron van skoon, helder en vars water wat spontaan uitbars en reiniging tot gevolg het. Die reiniging wat hier ter sprake is, is egter ook deurentyd beskikbaar - ’n fontein wat nooit ophou vloei nie.

Hierdie uitdrukking kom gereeld in die Skrif voor, so lees ons bv. in Ps.36:9-10 die volgende ~ Hulle verkwik hul aan die vettigheid van u huis, en U laat hulle drink uit die stroom van u genietinge. Want by U is die fontein van die lewe; in u lig sien ons die lig. In Jer.2:13 lees ons ~ Want my volk het twee verkeerde dinge gedoen: My, die fontein van lewende water, het hulle verlaat om vir hulle reënbakke uit te kap, gebarste reënbakke wat geen water hou nie. In Spr.14:27 lees ons hiedie pragtige woorde ~ Die vrees van die Here is ’n fontein van die lewe, om van die strikke van die dood af te wyk. Joël sê in Joël 3:18 ~ En op dié dag sal die berge drup van mos en die heuwels vloei van melk en al die spruitjies van Juda stroom van water; en uit die huis van die Here sal daar ’n fontein uitkom om die dal Sittim te besproei. Selfs Jesus het hierdie uitdrukking in Joh.4:14 gebruik ~ …maar elkeen wat drink van die water wat Ek hom sal gee, sal in ewigheid nooit dors kry nie, maar die water wat Ek hom sal gee, sal in hom word ’n fontein van water wat opspring tot in die ewige lewe.

Die doel met ’n fontein in Bybelse terme is dus om te reinig van onreinheid. Hierdie reiniging was in die Ou Testament gesimboliseer deur die reinigingsrituele en -offers en die doel met hierdie rituele was om diegene wat daaraan deelgeneem het te herinner aan die belofte van ’n beter verbond, die Nuwe Verbond, wat deur Jeremia in Jer. 31:34 belowe is ~ En hulle sal nie meer elkeen sy naaste en elkeen sy broer leer nie en sê: Ken die Here; want hulle sal My almal ken, klein en groot onder hulle, spreek die Here; want Ek sal hulle ongeregtigheid vergewe en aan hulle sonde nie meer dink nie. Ook Esegiël belowe dit in Eseg.36:25 ~ Dan sal Ek skoon water op julle giet, sodat julle rein kan word; van al jul onreinhede en van al jul drekgode sal Ek julle reinig.

Waarvan word die mense gereinig? Deut.9:18 sê dat dit ongehoorsaamheid is aan God se Wet. Reiniging van sonde beteken dus dat die oortreders van God se Wet - van God se wil; dit wat God ons beveel om te doen en nie te doen nie - om ons derhalwe skoon te was van al ons skuld teenoor God - om ons eens onrein en besmette lewe te reinig, sodat ons rein en geheiligd voor God kan staan en dit doen Hy natuurlik deur Sy Seun se soendood aan die kruis - Jesus Chirstus se dood, wat versoening tussen God en elkeen wat in Jesus Chirstus glo, te bewerkstellig.

In die Ou Verbondstydperk moes die mense gereing word met water (natuurlik ook die Hoë Priester voor hy in die Allerheiligste een maal per jaar op die groot Versoendag, gegaan het) en daarna moes hulle ’n bloedoffer gebring het vir die versoening van hul sonde. Dit is wonderlik om te sien hoe dat beide hierdie opdragte van reiniging en vergfnis in Jesus vervul is toe Hy aan die kruis gesterf het - ons lees daarvan in Joh.19:34 ~ Maar een van die soldate het met 'n spies in sy sy gesteek, en daar het dadelik bloed en water uitgekom.

In v.2 is daar weer sprake van “daardie dag” en dan sien ons dat die afgode en die profete en die onrein gees uit die land sal trek. Daar gaan dus op die “Dag van die Here” ’n skeiding plaasvind tussen God se kinders aan die eenkant en alles wat boos is aan die anderkant en dit móét gebeur, sodat God se kinders finaal gereinig en verheerlik kan word. Alle gelowiges sal derhalwe op daardie dag finaal gereinig word van hulle sondeskuld, maar ook van die mag van die sonde wat hulle so lank deur die loop van hulle lewe geteister het.

4. DIE AFGODE EN VALS PROFETE VERWYDER (vv.2-6):

In v.1 het Sagaria veryws na die innerlike reiniging van die volk, maar in vv.2-6 sonder hy twee booshede uit waar reiniging gaan plaasvind. Daar is sprake van profete wat verwyder sal word; wat om die lewe gebring sal word; wat nie meer harige profete-klere sal aantrek nie, ens., maar daar word ook verwys na die reiniging van afgodery.

Beide vals profete en afgodery was aan die orde van die dag onder volk net voor die noordelike koninkryk voor die Assiriërs in 721 v.C.- en die suidelike koninkryk voor die Babiloniërs in 586 v.C. geval het.

In v.2 sê Sagaria dat die afgode verwyder sal word en dit sal so deeglik geskied dat die mense nie eens sal terug dink aan hulle nie. As gelowiges is hierdie goeie nuus vir ons, want vir elkeen van ons wat worstel met sonde in ons lewe, weet dat dit iets is wat baie lank na ons vergifnis daarvoor ontvang het - lank nadat ons gereinig is daarvan, steeds terugdink daaraan en dat ons baie dikwels wat baie van hierdie sonde betref, selfs nog terug verlang daarna. Ek sê dat dit goeie nuus is vir ons, want daar gaan ’n dag aanbreek (“op daardie dag”) wanneer ons gedagtes en verlange na van ons sonde, finaal verwyder sal word en ons nooit, ooit weer daaraan sal dink of daarna sal hunker nie.

Die vals profete waarna Sagaria verwys, is sg. profete wat profesië uitgespreek het namens vals gode, maar ook mense wat hulle voorgedoen het as profete van God Almagtig wat vermetelde, verwaande en vals, of onwaar profesië gebring het. Lg. is in ooreenstemming met Deut.18:20-22 ~ ’n Profeet wat hom dit aanmatig om in my Naam iets te sê wat Ek hom nie beveel het nie, moet sterf. Dit geld ook van ’n profeet wat in die naam van ander gode praat. Volgens die Mosaïse wette moes so ’n vals profeet deur die swaard gedood word. Enersyds sal hiedie vals profete dus die ewige dood sterf, maar dit is ook nodig dat hierdie profete verwyder sal word onder die heiliges, sodat die uitverkorenes volkome gereing kan word.

Die heilige en heerlike teenwoodigheid van God op “daardie dag” sal so oorweldigend wees - so skrikwekkend vir die onheiliges dat hulle sal wil wegvlug van die aangesig van God - so ook die vals profete en daarom sal hulle weier (beeldspraak) om die tradisionele profetedrag te dra wat bestaan uit velklere en ’n velgordel om sy middel (2 Kon.1:8), omdat hulle te bang sal wees vir die straf wat gaan volg op valsprofete. Trouens hulle sal so bang wees dat hulle sal lieg oor die wonde (v.6) aan hul liggame wat hulle tydens vals godsdienstige rituele aan hul eie liggaame veroorsaak het [dink hier aan die Suid-Amerikaners wat hulleself laat kruisig; ander weer wat hulself met kettings en spykers slaan, ens. - die Hebreeuse woord wat hier gebruik word, is baie onseker, daarom dat sommige vertalngs verwys na wonde op die bors (NAV); tussen die hande (OAV); op die rug (ESV); tussen die arms (NASB); ens.]. Wanneer hulle gevra sal word waar hierdie wonde vandaan kom, sal hulle sê dat dit by hulle vriende se huis opgedoen is.

5. DIE DEURBOORDE MESSIAS (vv.7-9):

Sommige teoloë trek die lyn van v.6 na Jesus se kruisiging en sê dat hierdie wonde in v.6 heenwys na die wonde wat Jesus aan die kruis opgedoen het, maar dit is nie goeie eksegese wat toegepas word as jy dit wil sê nie, want die konteks waarin v.6 geskryf staan, verwys baie duidelik na vals profete en kan dus nie na Jesus verwys nie, maar Sagaria maak wel hierdie sprong in die volgende drie verse (vv.7-9) en is dit waarskynlik een van die duidelikste sketse wat in die ganse Ou Testament gemaak is van Jesus en Sy Bruid, die Kerk - hierdie drie verse het ‘n duidelike Messiaanse boodskap.

In vergelyking met die voorafgaande verse waar die Ou Testamentiese volk van God verstrooi en gestraf is vir hul sonde (o.a. afgode en vals profete) beweeg Sagaria nou na ’n toekomstige era waar Israel weer gesuiwer sal word soos goud en silwer (vv.8-9) en die oorblyfsel, God se nuwe volk sal wees (v.9).

In v.7 is God self aan die woord en sê Hy dat Sy swaard, Hom wat in Sy diens staan, met ’n swaard gaan tref. ’n Swaard weet ons, is simbool van dood. Wat verstommend hier is, is dat God Sy eie Herder met die dood gaan slaan en hierdie herder van God, is Sy Seun Jesus Christus. Hierdie is in ooreenstemming met Jesaja se profesie in Jes.53:10 ~ Dit was die wil van die Here om hom te verbrysel, om hom die pyn te laat ly. As hy sy lewe as skuldoffer gee, sal hy 'n nageslag hê en nog lank lewe, deur hom sal die wil van die Here sy doel bereik.

Ons sien dus reeds in die Ou Testament dat Jesus se dood aan die kruis op Golgota, God se plan was om Sy Seun te offer, sodat die wie in Hom glo, gered kan word. Wat egter interessant is, is dat Sagaria voortgaan en sê dat die Herder se dood tot gevolg sal hê dat die skape uitmekaar gejaag sal word. Hoe moet ons dit verstaan? Baie mense glo dat hier na die volk Israel verwys word, wat nie lank na Christus se dood en opstanding en hemelvaart, of gedood, of uitmekaar gejaag is gedurende 70 n.C. met die val van Jerusalem, maar dit kan nie wees nie, want in Joh.10:26 was Jesus baie duidelik daaroor, dat hulle nie Sy skape is nie, omdat hulle nie glo nie. Wie dan is hierdie skape waarna Sagaria verwys? Verder weet ons ook dat die die eertydse volk van God - Israel, vervulling gevind het in die Nuwe Testamentiese Israel, nl. al die uitverkore gelowiges in Jesus Christus. Hierdie skape is dus die gelowiges. Maar waarom word hulle uitmekaargejaag? Eerstens het Jesus dit reeds voorspel in Joh.16:32 toe Hy gesê het ~ Kyk, daar kom 'n tyd, en dit is nou al hier, dat julle uitmekaar gejaag sal word, elkeen sy eie koers in, en dat julle My alleen sal laat; en tog is Ek nie alleen nie, omdat die Vader by My is.

In Hand.8:1-4 lees ons wat met die gelowiges na Stefanus se marteldood gebeur het ~ Ook Saulus het hierdie moord goedgekeur. Daardie dag het daar 'n hewige vervolging van die gemeente in Jerusalem begin. Al die gelowiges behalwe die apostels is uitmekaar gejaag en verstrooi oor die gebiede van Judea en Samaria. Godvresende mense het vir Stefanus begrawe en daar is baie oor hom gerou. Saulus het die kerk probeer uitroei. Hy het van huis tot huis gegaan, mans en vrouens laat uitsleep en hulle in die tronk laat sit. Die gelowiges wat uitmekaar gejaag is, het so ver as wat hulle gegaan het, die evangelie verkondig. Beide Jakobus (Jak.1:1) en Petrus (1 Pet.1:1) verwys ook na die Kerk as …vreemdelinge in die wêreld, wat verspreid woon in die provinsies. Petrus sê ook in 1 Pet.2:11 ~ Geliefdes, in die wêreld is julle vreemdelinge en bywoners. Daarom dring ek by julle daarop aan om nie aan sinlike begeertes toe te gee nie. Dit verwoes net 'n mens se lewe.

Waarom moet die gelowiges vervolg word en “uitmekaar gejaag” word? Waarom word hulle “veroordeel en uitgeroei” (baie mense sal hier praat van ’n “wrede God” waarmee hulle niks te doen wl hê nie) - wat gee aanleiding tot hierdie optrede van God? Jesus sê in Matt.16:24-25 ~ Toe sê Jesus vir sy dissipels: "As iemand agter My aan wil kom, moet hy homself verloën, sy kruis opneem en My volg, want wie sy lewe wil behou, sal dit verloor; maar wie sy lewe ter wille van My verloor, sal dit terugkry. In Matt.10:38 het Jesus gesê ~ Hy wat nie sy kruis opneem en My volg nie, is nie werd om aan My te behoort nie. Waarom moet ons, ons kruis opneem om Jesus na te volg; waarom moet ons swaarkry; waarom moet ons vreemdelinge in hierdie wêreld wees; waarom moet ons vervolg en uitmekaar gejaag word? Wel, eerstens omdat ons Meester al hierdie dinge deurgemaak het en wanneer ons ook swaarkry, identifiseer ons met Sy swaarkry. Is dit egter genoeg rede? Wat meer is, alle mense (ook heidene, kry swaar)? Wat Jesus hiermee bedoel, is dat ons ons lewe moet toewy aan Hom en gehoorsaam moet wees aan Hom - selfs tot die dood toe. Vir Jesus om aan die kruis te gesterf het, was nie kinderspeletjies nie, trouens dit was geweldig pynlik en vernederend en die implikasie daarvan vir ons as gelowiges, is dat ons bereid moet wees om te alle tye gehoorsaam aan Hom te wees, al het dit pyn en lyding - ja selfs die dood, tot gevolg.

V.9 verskaf aan ons die antwoord, nl. dat die klein oorblyfsel (een derde), deur vuur gelouter sal word soos silwer gelouter word en soos silwer en goud gesuiwer word. Gelowiges word vergelyk met silwer en goud, maar ons kort suiwering. Aan die “einde van die dae” sal elke gelowige gesuiwer wees van alle dros wat nog aan ons mag kleef en sal ons heilig en vlekkeloos voor God kan staan ~ Verheug julle hieroor, selfs al is dit nodig dat julle 'n kort tydjie bedroef gemaak word deur allerhande beproewings sodat die egtheid van julle geloof getoets kan word. Julle geloof is baie kosbaarder as goud, goud wat vergaan. Selfs die suiwerheid van goud word met vuur getoets, en die egtheid van julle geloof moet ook getoets word, sodat dit lof en heerlikheid en eer waardig mag wees by die wederkoms van Jesus Christus (1 Pet.1:6-7).

Terwyl ons gelouter word sê Sagaria sal ons die Here aanroep en Hy sál ons hoor (v.9). Hierdie is ’n belofte wat regdeur die Skrif aan God se kinders gegee word - o.a. Ps.91:15 ~ Wanneer hy My aanroep, sal Ek sy gebed verhoor; in sy nood sal Ek by hom wees, Ek sal hom red en hom in sy eer herstel. Trouens Jesaja sê in Jes.65:24 ~ Voor hulle nog roep, sal Ek antwoord, terwyl hulle nog praat, sal Ek hulle gebed verhoor. Wat ’n belofte! Wat ’n vreugde!

7. AFSLUITING:

Reeds in die Ou Testamentiese tyd het die mense geweet dat hulle verlore is; dat hulle onrein voor God staan en daarom het hulle reiniging nodig gehad. Ongelukkig het talle en talle Jode bloot net deur die rituele gegaan en nooit hulle vertroue en geloof in die beloofde Messias Jesus Christus geplaas nie - hulle was dus nooit deel van die uitverkorenes nie - net so is daar miljoene wat ná Christus ook nie deel van die uitverkorenes was, of is nie, omdat hulle nie in die reeds gekome Verlosser, Jesus Christus geglo het nie.

Indien jy vandag dalk wonder of jy uitverkies is; of jy “op daardie dag” - die Dag van die Here verheerlk sal word - luister dan na Martin Luther se woorde: Are you elect? If you follow this advice, if you first recognize that you are a child of wrath by nature, guilty of eternal death and damnation, from which no creature, either man or angel, is able to save you, and if you then grasp God’s promise, believing that He… has sent Christ, His only Son, to render satisfaction for your sin, to give you His innocense and righteousness, and finally to redeem you from all danger and death, then do not doubt that you belong to the little flock of the elect.

Erken jy dat jy van nature boos en onrein is? Verdien jy op grond daarvan die ewige dood waaruit jy nooit sal kan ontsnap nie? MAAR, glo jy in die Woord van die Here wanneer dit in Hand.13:38-39 sê ~ Laat dit dan aan julle bekend wees, broeders, dat deur Hom vergifnis van sondes aan julle verkondig word, en dat elkeen wat glo, deur Hom geregverdig word van alles waarvan julle deur die wet van Moses nie geregverdig kon word nie. As jy dit glo, is jy gered en is jy deel van die uitverkorenes - Leef nou daarvolgens en as dit gepaard gaan (en dit sal) met vervolgng oor jou gehoorsaamheid, weet dat Hy identifiseer met ons swaarkry, want Hy het self daardeur gegaan en daardeur word ons gesuiwer, ten einde vlekkeloos voor die heilige God te kan staan!

[Boodskap: Kobus van der Walt (3Riviere Baptiste Kerk, 23 Augustus 2015)]

Ons Geloofshoekpenne

1. SOLI DEO GLORIA - DIE EER VAN GOD ALLEEN Alles wat God beplan het en in die geskiedenis uitvoer (niks wat is of gebeur, is uitgeslote nie), het een finale doelwit, nl. om Homself te verheerlik. Die najaging van hierdie doel is dan ook elke mens se hoogste en onontkombare roeping. Om vir jouself te leef, is die wese van sonde

2. SOLUS CHRISTUS - CHRISTUS ALEEN Hierdie genade wat God aan miljoene sondaars deur alle eeue betoon het, was nog altyd volledig gebaseer op die volmaakte middelaarswerk van Sy Seun, Jesus Christus, en daarop alleen.

3. SOLA SCRIPTURA - DIE HELE SKRIF EN NET DIE SKRIF Die hele Bybel, en net die Bybel, is God se besondere en geïnspireerde openbaring aan die mens. Daarom is dit algeheel betroubaar en die universeel gesagvolle norm vir leer en lewe.

4. SOLA GRATIA - GENADE ALLEEN As 'n sondaar gered word, dan is dit geheel-en-al te danke aan God se vrye genade, en daaraan alleen.

5. SOLA FIDE - GELOOF ALLEEN God verklaar enige en elke sondaar regverdig wanneer die vanuit sy of haar geestelike en morele bankrotskap volledig op die middelaarskap van Jesus Christus staat maak ten einde vir God aanvaarbaar te wees. Daar is geen ander manier om met God versoen te word nie. Geen menslike verdienste, van watter aard ook al, kan Christus se verdienste aanvul nie; trouens, die Woord waarsku uitdruklik dat enige poging daartoe diskwalifiserend is.

Wat Glo ons?

DIE WAARHEID MAAK VRY!

Watter waarheid maak vry?
1. Daar is maar net een waarheid en dit is die waarheid soos opgeteken in die onfeilbare Woord van die Drie-Enige God (“Die hele Skrif is deur God geïnspireer en het groot waarde om in die waarheid te onderrig, dwaling te bestry, verkeerdhede reg te stel en ŉ regte lewenswyse te kweek” - 2 Tim 3:16).

2. Ons glo voorts dat die geskrifte van die Ou- en Nuwe Testament, God se besondere openbaring aan die mens is; dat dit, soos oorspronklik neergeskryf, ten volle deur God geïnspireer is; dat hierdie openbaring (die kanon) afgesluit en genoegsaam is; dat dit volkome betroubaar is m.b.t. leer en inhoud; en dat dit die hoogste en finale gesag is vir geloof en lewe (2Tim.3:15-17; Jes.8:20; Luk.16:29-31; Ef.2:20; Rom.1:19-21; Rom.2:14-15; Ps.19:1-3; Hebr.1:1; Spr.22:19-21; Rom.15:4; 2Pet.1:19-20).

3. Ons glo in die enigste en ewige Drie-enige God: Vader, Seun en Heilige Gees – soos Hy Homself in al Sy verhewe heerlikheid in die Heilige Skrif aan ons openbaar (Deut.6:4; Jer.10:10; 1Kor.8:4-6; 1Tes.1:9; Matt.28:19; 2Kor.13:14).

4. Ons glo dat God alle dinge geskape het, met die mens as kroon en rentmeester van Sy skepping. Die eerste mens, Adam, het in sonde geval en so sy oorspronklike geregtigheid verloor. So het hy homself en die hele skepping in ellende gedompel. Dit geld besonderlik sy nageslag (die ganse mensheid), wat sedertdien in verlore toestand onder God se toorn verkeer. Gevolglik het alle mense, reeds vanaf ontvangenis en geboorte, deel aan die erfsonde, wat enersyds die erfskuld (juridies skuldige toestand onder die oordeel van God) en andersyds die erfsmet (moreel verdorwe toestand van sondegeneigdheid) behels. Die gevalle mens is dus geestelik dood en sonder die lewendmakende herskeppingswerk van die Heilige Gees is dit totaal buite sy vermoë om die Evangelie te verstaan, in Christus te vertrou, van sonde te bekeer, God lief te hê en Hom te gehoorsaam (Gen.1:31; Kol.1:16; Rom.3:23; 5:12; Titus 1:15; Gen.6:5; Jer.17:9; Rom.3:10-19; 5:12-19; 1Kor.15:21, 22, 45, 49; Ps.51:7; Job 14:4; Ef.2:3; Rom.6:20; 5:12; Hebr.2:14-15; 1Tes.1:10).

5. Ons glo in Jesus Christus, God se Seun, wat ontvang is van die Heilige Gees en uit die maagd Maria gebore is as volkome God en volkome mens vir ewig. Hy het as God se Groot Profeet, Priester en Koning na hierdie wêreld gekom. Hy is Hoof van die uitverkore mensheid en God se hoogste en finale openbaring aan die mens (Matt.1:22-23; Luk.1:27, 31, 35; Rom.1:3-4; Fil.2:6-11; Kol.2:9).

6. Ons glo in Jesus Christus as enigste Middelaar tussen God en sondaars. Hy is gekruisig en het gesterf ten einde hulle van die heerskappy en gevolge van hul sonde te verlos. Hy het in volmaakte gehoorsaamheid onder die Wet gelewe sodat Sy geregtigheid aan hulle toegereken kan word. Hulle kry nie deel aan hierdie dubbele verlossingsgenade van God op grond van enige eie verdienste nie, maar dit word aan hulle toegereken deur geloof alleen. Hierdie geloof is nie bloot regsinnige opinie nie, maar is, vanuit diep bewussyn van eie onwaardigheid, lewenslange en uitsluitende vertroue in Jesus Christus wat as Versoeningsoffer die Vader se heilige geregtigheid volkome bevredig het. Geloof is enersyds soewereine gawe van God, gewerk deur Sy Gees; dit is andersyds verantwoordelikheid en werklike handeling van die mens self. Tussen hierdie twee kante van geloof is daar ten diepste geen teenstrydigheid nie (Joh.5:39; 14:6; Hand.4:12; Rom.5:12-19; 1:2-4, 16-17; 11:33-36; Ef.2:8-9; 3:1-14; Openb.5:9-10; 7:10; Rom.4:16, 23-25; Ps.110:3; Joh.6:37, 44; Hand.13:48; 16:14).

7. Ons glo in Jesus Christus se persoonlike, liggaamlike en historiese opstanding uit die dood; in Sy hemelvaart; en in Sy huidige heerskappy ter wille van Sy mense en om alles aan Hom te onderwerp (Hand.1:3; 2:33; 13:38-39; 1Kor.15:3-6; Gal.3:16-22; Ef.1:10; Kol.1:20).

8. Ons glo in die persoonlike wederkoms van Jesus Christus (Hand.10:42; Rom.14:9-10; 1:11; 2Pet.2:4).

9. Ons glo dat Jesus Christus deur die werk van die Heilige Gees vir Hom ewige volk uit die ganse mensdom versamel, ongeag ras, geslag of stand. Elkeen wat hieraan deel het, toon die egtheid daarvan deur volhardende gehoorsaamheid aan Hom (Joh.17:2-5; 2Kor.5:18-19; 1Pet.1:3-4; Joh.1:12-13; 1Kor.2:6-16; 1Joh.5:1).

10. Ons glo in die Heilige Gees. Hy het op die Pinksterdag as Parakleet (Trooster / Voorspraak / Helper) vanaf die Vader en die Seun na die Nuwe Testamentiese gemeente gekom. Sedertdien woon Hy in alle ware gelowiges om die Seun se Middelaarswerk en regering in hulle te verwerklik. Sodoende verheerlik Hy Jesus Christus in en deur gelowiges en is Hy die waarborg dat hulle hul volle erfenis as God se kinders uiteindelik sal ontvang. Hy lei elkeen van hulle, sonder opheffing van hul verantwoordelikheid of gehoorsaamheidsvolharding, na die finale afronding van hul verlossing d.m.v. die Woord en die genademiddele wat daarmee saamhang. Sonder Sy wederbarende verligtende, versekerende, heiligmakende en toerustende werk is ware Christenskap en kerkwees totaal onmoontlik (Hand.2:39; Rom.8:9, 14, 17, 23, 26; Luk.11:13; Ef.1:13-14; 4:30; 5:18-21; 1Kor.12:4-11; 12-13; 2Kor.3:18; Kol.3:10; Joh.14:16-18, 26; Gal.5:16-26; 1Tes.5:19).

11. Ons glo in die liggaamlike opstanding uit die dood van alle mense – diegene wat in Christus gesterf het om deel te hê aan die ewige saligheid en die res om deel te hê aan die ewige verdoemenis (Rom.1:4; 4:25; 6:5; 1Pet.1:3; 1Kor.15:12-21, 20-21; Matt.27:53; Hand.1:21; 2:31; 3:21).

12. Ons glo dat Jesus Christus alle ware gelowiges (en net hulle) beveel om Hom van plek tot plek gesamentlik in gemeenteverband te dien volgens die riglyne wat Hy daarvoor in die Skrif neerlê, Elke gelowige is dus verantwoordelik om hom, indien enigsins moontlik, by ’n gemeente te voeg waar die Here in gees en waarheid gedien word; om hom aan die broers en susters toe te wy; en om hom aan die gepaardgaande dissipline te onderwerp. So ’n plaaslike gemeente staan slegs onder die gesag van Jesus Christus, maar benodig tog vir sy welsyn gemeenskap met ander gemeentes waar die Here ook in gees en waarheid gedien word (Hand.2:42-47; 20:7; Ps.119:148; Matt.6:6; 18:15-20; 1Kor.12:12-27; Ps.84; Hebr.10:25; Rom.1:7; Ef.1:20-22).

13. Ons glo dat Jesus Christus die Doop en die Nagmaal ingestel het en dat dit deur alle ware gelowiges (en net hulle) in gehoorsaamheid en as belydenis onderhou moet word as heenwysing na die mees basiese aspekte van hulle geloof en verlossing. Die Doop is die onderdompeling van die gelowige in water as belydenis van sy identifisering met Jesus Christus in Sy dood, begrafnis en opstanding. Die Nagmaal is die deelname aan die brood en die beker wat wys op Jesus Christus se versoeningsoffer, naamlik Sy gebroke liggaam en gestorte bloed (Hand.2:37-41; 8:12-13, 36-38; 9:18; 10:47-48; 11:16; 15:9; 16:14-15, 31-34; 18:8; 19:3-5; 22:16; 1Pet.3:21; Rom.6:3-4; Gal.3:27; Kol.2:12; 1Pet.3:21; Hebr.9:25, 26, 28; 10:22; Matt.7:6; 15:9; 26:26-28; 28:19-20; Joh.3:23; 6:29, 35,47-58; 1Kor.10:1-2, 16, 17, 21; 11:23-29; 2Kor.6:14-15; Eks.20:4-5; ).

OPE BRIEF AAN DIE N.G. KERK

(Meer as 3000 kopiee van hierdie brief is uitgestuur na alle beskikbare E-Posadresse in die N.G. Kerk)

2012-05-04

Geagte Broeder

Na baie gebed en besinning rig ek hierdie brief aan u en ’n klompie ander broeders in die N.G. Kerk en vra dat u hierdie brief biddend sal lees en met ’n oop gemoed daarna sal kyk.

Ek is tans ’n predikant in die Vaaldriehoek Gereformeerde Baptistegemeente en het teologie studeer aan die Potchefstroomse Universiteit vir C.H.O. Voor ek voltyds in die bediening betrokke geraak het, was ek baie lank ’n onderwyser waarvan 12 jaar as skoolhoof. Ek en my vrou was ook baie jare lidmaat van die N.G. Kerk, maar is in 1984, toe die N.G. Kerk nog gestaan het op hul belydenisskrifte, onder sensuur geplaas en afgesny van ’n N.G.-gemeente in Ermelo omdat ons, nadat ons waarlik tot wedergeboorte gekom het, oortuig geraak het van die doop van gelowiges (die kredodoop) en ons laat doop het. Ons het deur die jare heen hegte vriendskapsbande met N.G.-lidmate gehad (en het nog steeds) – lidmate wat waarlik die Here Jesus Christus as Saligmaker navolg (beide "kredo- en paedodopers").

Ek glo met 'n gebroke hart dat 'n skokkende groot deel van die institusionele kerk van ons dag grootliks koers verloor het, in sekere gevalle selfs reddende geloof versaak het, en dringend nodig het om onverwyld en met hartstog terug te keer na die fundamentele geloofsvertrekpunte van die Reformasie: die Skrif alleen, genade alleen, Christus alleen, geloof alleen, die eer van God alleen. Ek onderskryf die histories-gerespekteerde en internasionaal-erkende 1689 Baptiste Belydenis - soos meeste reformatoriese (gereformeerde) Baptiste oor die wêreld heen, asook die Belydenisskrif en Kernwaardes van Sola 5, 'n assosiasie van Godgesentreerde evangeliese gemeentes en gelowiges in (tans) agt lande in Suider-Afrika

Waarom rig ek hierdie brief aan u? Die afgelope jaar of drie, maar veral die afgelope jaar het ek intens bewus geraak van ernstige dwaalleer wat posgevat het in die N.G. Kerk en ek is intens besorg oor broers en susters in die Here Jesus Christus wat in die N.G. Kerk is. Ek kry van tyd tot tyd te doen met predikante in u denominasie en ek ervaar intense bekommernis en selfs verwarring by van hulle (veral jongeres).

Ek het ook bevriend geraak met heelwat N.G.-lidmate en ’n paar predikante op "Facebook" en kon ek sommige van die debatte wat gevoer word tussen regsinnige lidmate en –predikante aan die eenkant en "nuwe hervormers"/"verligtes"/"liberales"/"vrydenkers" aan die anderkant. My simpatie met die "behoudendes" aan die eenkant en my skok en ontnugtering in predikante wat in my oë bykans niks meer van die Woord van God glo nie, het a.g.v. hierdie debatte, net nog verder verdiep.

Wat ek nie kan verstaan nie, is dat die N.G. Kerk oënskynlik die wil en vermoë verloor het om op te tree teen teoloë, ampsdraers en predikante wat nie meer volgens die Belydenisskrifte en die Woord van God optree nie en derhalwe in my oë dwaalleraars geword het (Openb.2:14-15; 1 Tes.5:14; 2 Tim.4:2-5; Deut.13:5; 1 Kor.5:11, 13; Titus 1:9; e.a.). In die lig van Ferdie Mulder se boek, asook dit wat ek in die pers, persoonlike Blogs en "Facebook" lees, kan ek nie anders as om te dink dat die gesagstrukture van die N.G. Kerk reeds deur die "nuwe hervormers" gekaap is en daarom dat niks gedoen word aan persone/lidmate wat die Kerk van die Here Jesus Christus intens skade berokken nie.

Ek kan bv. nie verstaan hoe ’n persoon soos Jean Oosthuizen steeds maar net toegelaat word in sy posisie by die Kerkbode, terwyl hy blatant voortgaan om mense (insluitende myself) te belaster, te beledig, te verkleineer en geen standpunt inneem teen dwaalleer nie – hy maak ’n openlike bespotting van God Drie-Enig, ens. (Titus 1:16; e.a.). Hy gebruik baie dikwels kru taal teenoor mense wat opgevoede heidene nie eens sal gebruik nie (’n voorbeeld van een van die "Facebook" drade wat hierdie feite bevestig kan op versoek verskaf word) en dan praat ek nie eens van sy persoonlike "Facebook-muur" nie! Christene wat sterk van hom op Facebook verskil, word summier geblok, maar ateïste word ‘n vry hand gegee om God te laster. Dit lyk na ‘n eensydige skending van spraakvryheid.

Ek staan verstom en geskok oor sommige predikante se uitsprake oor die hel (wat kwansuis nie bestaan nie – Matt.5:22; Mark.9:47-48; 1 Tim.1:19-20; e.a.); die feit dat Satan nie ’n werklikheid is nie (Jak.4:7; 1 Pet.5:8; e.a.); geen sondeval nie (Gen.3; 1 Joh.1:6, 8; e.a.); dat Jesus nie uit ’n maagd gebore is nie (Matt.1:18; Luk.1:34; e.a.); die feit dat Christus nie uit die dood opgestaan het nie (Luk.24:36; Joh.20:27; e.a.); dat Jesus Christus nie aan die regterhand van God die Vader sit nie (Mark.16:19; e.a.); die skepping; Jona en Noag wat mitologiese verhale is; uitsprake wat positief is oor die "emergent church", panenteïsme, homoseksualitiet, ens. ens. My vraag is, hoe die N.G. Kerk steeds kan toelaat dat die gewone lidmaat (geredde en soekendes) wat op soek is na ’n ware en intieme verhouding met Jesus Christus en groei in heiligmaking, blootgestel kan word aan sulke predikante en selfs ’n moderator? Manne soos Nelus Niemandt; ’n Albert Cruywagen; Gerhard Bothma; Ben du Toit en talle teologiese professore en andere? Ek wil nie eers kommentaar lewer op sommige sinodale besluite nie.

Ek wil nie eers kommentaar lewer op sommige werklik-ontstellende Algemene Sinode- besluite nie.

Aan die begin van hierdie jaar, toe ek ook Ferdie Mulder se boek "Opgestaan" gelees het, is dit wat ek ervaar, gehoor, gelees en vermoed het, opnuut bevestig en het ek net nog meer intens bewus geraak van wat in die N.G.K. aan die gang is en wat sommige van u as predikante, studente en talle lidmate moet ervaar. My hart het al meer begin pyn vir regsinnige (gereformeerde) broers en susters in die N.G. Kerk en het ek net nog dieper bewus geraak van die nood; die paniek; die verwarring; die pyn; ens. wat besig is om pos te vat by diesulkes. Ek is veral ook intens bekommerd oor "onskuldige" kinders wat "losgelaat" word in van die teologiese fakulteite waar N.G. predikante opgelei word.

Ek en ons gemeente is tans deel van "SOLA 5", ’n assosiasie van Evangeliese Christene in Suidelike Afrika en ek dien ook tans op die hoofbestuur van "SOLA 5". Die meeste van die predikante wat deel uitmaak van "SOLA 5" is Engelssprekende broers in die Here en hulle wil gedurig van my weet wat aan die gang is in Afrikaanse kerklike geledere en hoe ek dit sien. Ek self vra my daagliks die vraag af: Wat gaan hier aan? Wat kan ons doen – wat kan ek doen? Dit gaan tog immers hier oor die eer van God en die waarheid!

Die Skrif roep ons ernstig op om te waak teen dwaalleer, omdat dit mense weglei van die geopenbaarde waarhede. Dit is nie ‘n saak wat enige Christen by hom kan laat verbygaan nie (2 Pet.2:1-2; Titus 1:7-11; 2 Tes.2:15; e.a.).

My broeder in Christus, ek is intens bekommerd oor die Kerk in Suid-Afrika in die algemeen en dan spesifiek oor wat aan die gang is in die N.G. Kerk en ek bid dat die Here sal ingryp en Sy eer sal herstel. Ek wens so dat ek hande kon vat met u in hierdie stryd op vergaderings, forums, sinodes, ens., maar omdat ek nie lidmaat van die NGK is nie, kan ek nie en kan ek u maar net verseker van my voorbidding en dat ek waar moontlik my bydrae sal lewer.

Sterkte in die stryd – ek dink aan u!

U broeder in Christus Jesus.

Kobus van der Walt