.: XENOFOBIE en ons as GELOWIGES

Wednesday, April 22, 2015

XENOFOBIE en ons as GELOWIGES

1. WAT IS XENOFOBIE:

Wanneer ons praat van xenofobie, verwys ons na “vreemdelinge-haat”. Dit is haat wat ontketen

word deur die teenwoordigheid van buitelanders in ’n bepaalde land en ’n deel van die bevolking, of burgers van die land haal hul frustrasie; ongelukkigheid; haat; ens. op hierdie buitelanders uit, deur hulle besighede te boikot; hul besighede te vernietig; hul persoonlike eiendom te steel en te vernietig; dit vir hulle ongemaklik/onmoontlik in die werkplek maak; hul die gemeenskap verdryf; hul aanrand; besteel en selfs vermoor, ens.

2. AGTERGROND:

Ons het reeds in die verlede sporadiese voorvalle van xenofobie in ons land ervaar, maar nog nooit was dit so erg soos die afgelope maand of twee nie – soveel so dat die weermag saam met die polisie in brandpunte ontplooi is (dit laat ’n mens aan die Apartheids regime dink wat gereeld klokreëls in onlusgeteisterde gebiede ingestel het). Tientalle buitelanders se winkels is gestroop en selfs afgebrand; buitelanders is aangerand en in enkele gevalle is daar selfs van die buitelanders vermoor.

Daar word beweer dat die vlaag van aanvalle begin het toe die Zoeloe koning Goodwill Zwelinthini, onlangs tydens ’n massa byeenkoms, gesê het dat buitelanders “hul goed moet pak en gaan”, omdat hulle burgers van die land se werk neem. Kort daarna het geweld in Durban uitgebreek en verder versprei na ander dele van die land.

Die V.N. sê egter dat die nuutste vlaag van geweld, reeds in Maart na ’n arbeidsgeskil tussen buitelanders en burgers, begin het.

Dit is ongetwyfeld so dat een van die redes vir die geweld, voor die deur gelê kan word van “blouboordjie werkgeleenthede” en buitelanders wat dit opraap voor burgers van die RSA. Conrad Mbewe (Leraar van Kabwata Baptist Church in Lusaka, Zambië – sien: http://sola5.org/xenophobia-south-africa-ticking-time-bomb/) het verlede week o.a. die vraag gevra waarom Suid-Afrikananse werkgewers voorkeur verleen aan buitelanders (spesifiek Afrikane vanuit die res van Afrika)? Hy het o.a. gesê dat hierdie tendens waar buitelanders verkies word bo plaaslike inwonners, nie iets nuuts is nie. In Amerika bv. is dit werkers vanuit Latyns-Amerikaanse lande wat die blouboordjie poste opraap; in Wes-Europa is dit mense uit Oos-Europa ens. en volgens Conrad is die rede hiervoor, baie eenvoudig: “They (die buitelanders) are harder working and that for less pay!” Hy gaan voort deur te sê dat die rede waarom xenofobie in die VSA en Europa bykans nooit tot gladnie plaasvind nie, die gevolg van ŉ baie lae werkloosheidsyfer is – die implikasie: Suid-Afrika, wat sit met ’n hemelhoë werkloosheidsyfer, moet werk begin skep en dit sal tot gevolg hê dat xenofobie drasties sal verminder.

“Blouboordjie werkgeleenthede” is egter nie die eigste rede vir xenofobie nie (en ek is millenia

ver verwyder daarvan om ’n politieke- en/of arbeidsontleder te wees) en ek grond dit bloot net op een realiteit en dit is dat daar min tot geen xenofobiese geweld in die werkplek plaasgevind het die afgelope tyd. Hierdie barbaarse aanvalle is primêr gemik teen entrepreneurs (handelaars) – dalk is dit bloot net die top van die ysberg en baie maklike teikens vir die aanvallers, terwyl butelanders by bv. myne, baie meer beskernd is – daar is bloot net nóg redes vir xenofobie en hierdie saak het derhalwe meer om die lyf as wat dit op die oogaf lyk.

Net laastens wat hierdie agtergrond betref, is dat die Minister vir Staatsveiligheid beweer dat so min as 1% van die bevolking pro-xenofobiese geweld is. As ’n mens die media (Face Book, nuusberigte, ens.) as maatstaf moet geruik en na die reaksies op die geweld kyk, wil dit tog lyk asof hy reg is, veral ná Maandag (20 April 2015) wat daar ’n geweldige positiewe burgerlike reaksie was waartydens mense betoog het téén xenofobie (in Alexandra bv. het plaaslike mans deur die nag wag gestaan om buitelanders te beskerm).

3. GEVOLGE:

Wat is die gevolge van hierdie vreemdelinge-haat? Weereens is ek nie ’n kenner nie, maar soos dit vir my lyk en klink kan ek dit baie kortliks as volg opsom:

• Suid-Afrika raak (opnuut) die muishond van die wêreld;

• Suid-Afrikaners in die buiteland vrees vir hul lewe en/of besittings (dosyne wit Suid-Afrikaners het

die afgelope tyd inderhaas Mosambiek verlaat en terug gekeer na Suid-Afrika);

• Suid-Afrika se handelsmerk in die buiteland ly geweldige skade;

• Oorsese beleggers raak net nog meer huiwerig om in ons land te belê wat ’n verdere negatiewe uitwerking op die land se ekonomie het;

• Mense leef in vrees en sien allerlei spookbeelde van ’n land wat in vlamme opgaan en waar grootskaalse bloedvergieting plaasvind (soos Conrad dit noem, “South Africa’s ticking time bomb”) – bloedvergieting soos in die jare 60 en 70 in Afrika met Uhuru.

• Met die EFF se uitgsproke en miltante optrede, wat o.a. insluit dat blankes moet terug gaan na vanwaar hulle oorspronklike vandaan kom (o.a. Europa); standbeelde van historiese blanke figure wat toegetakel word met verf; oop stukke grond wat beset word (openlike provokasie dus). Ook die ANC-regering se openlike diskriminasie teen blankes as dit kom by aanstellings; sprake dat plase verklein gaan word a.g.v. die regering se grondhervormingsbeleid (wat tot gevolg het dat Blanke boere op groot skaal die land verlaat en elders in Afrika gaan boer), ens. Dit alles en nog baie meer het tot gevolg dat blankes al meer en meer in vrees begin lewe en hulle, hulself die vraag afvra, “Hoe lank nog voor xenofobiese-aanvalle teen blankes gaan begin?”

• Dit wil lyk asof die vlaag van xenofobie in ons land enersyds aangehits word deur ’n “onbekende mag” t.w.v. uiteindelike politieke gewin, deurdat hulle die regering van die dag in ’n slegte lig wil stel (die EFF dalk?). Politieke instabiliteit is dus nog ’n moontlike gevolg van die vreemdelinge haat.

Natuurlik is daar nog veel meer gevolge wat genoem kan word.

4. DIE WOORD VAN GOD:

Kom ons kyk net eers na ’n paar teksverse wat iets oor vreemdelinge te sê het:

• Eks.23:9 ~ Jy mag 'n vreemdeling nie laat verdruk nie. Julle ken die lewe van ’n vreemdeling, want julle was vreemdelinge in Egipte.

• Lev.19:10 ~ Julle moet ook nie die wingerde 'n tweede keer oes of die korrels wat val, optel nie. Laat dit alles bly vir die armes en die vreemdelinge. Ek is die Here julle God.

• Lev.23:22 ~ Wanneer julle julle lande oes, moet julle nie die wenakkers afoes of die are wat bly lê, optel nie. Julle moet dit los vir die armes en die vreemdelinge. Ek is die Here julle God (dink bv. hier aan Rut wat ’n vreemdeling uit ’n ander land was en nogtans sluit God haar in by die “heilige lyn” uit wie se nageslag, ons Verlosser Jesus Christus uiteindelik gebore sou word).

• Deut.10:19 ~ Jy moet ook die vreemdelinge liefhê, want jy was self 'n vreemdeling in Egipte.

• Deut.26:11 ~ Jy moet al die goeie dinge geniet wat die Here jou God aan jou en jou huisgenote gee, jy en die Leviete en die vreemdelinge wat by jou woon.

• Num.15:30 ~ Maar die siel wat iets moedswillig doen, van die kinders van die land of van die vreemdelinge, hy versmaad die HERE; en dié siel moet uitgeroei word onder sy volk uit.

• Ps.146:9 ~ Hy beskerm vreemdelinge en help weeskinders en weduwees, maar Hy versper die pad vir die goddeloses.

• 1 Pet. 1:1 ~ Van Petrus, 'n apostel van Jesus Christus. Aan die uitverkorenes van God, vreemdelinge in die wêreld, wat verspreid woon in die provinsies Pontus, Galasië, Kappadosië, Asië en Bitinië.

• 1 Pet.2:11 ~ Geliefdes, in die wêreld is julle vreemdelinge en bywoners. Daarom dring ek by julle daarop aan om nie aan sinlike begeertes toe te gee nie. Dit verwoes net 'n mens se lewe.

(Hierdie is maar enkele teksverse wat vir ons ’n aanduiding gee van wat die Here se gesindheid is jeens vreemdelinge).

5. GELOWIGES SE GESINDHEID/REAKSIE:

Wat staan ons as gelowiges te doen in die lig van hierdie xenofobiese aanvalle in ons land? Wat verwag die Here van ons?

Baie kortliks die volgende:

• Ons moet eerstens besef dat vreemdelinge ’n spesiale plek in God se hart het.

• Ons moet ons naaste lief hê – beslis ook vreemdelinge – ongeag van wat hulle motief met hul vlug/koms na Suid-Afrika is (moet nie vir my sê dat hulle net ’n spul diewe, moordenaars, swendelaars en dwelmhandelaars is nie – ja, daar is sekerlik ’n groot hoeveelheid van hulle wat hierdie etiket verdien), is die woord van God baie duidelik daaroor dat ons, ons naaste moet lief hê, maar ook ons vyande.

• As gelowiges moet ons nie deel word van ongeverifieerde praatjies en bang-maak-stories nie.

• Ons moet nie soos die wêreld, sommer net aanneem dat wanneer daar ’n moord of watter misdaad ook al gepleeg is, dit “Nigeriërs of Zimbawiërs” was nie – sê wie? Indien ons sulke bewerings maak, kan ons dit motiveer met statistiek? Besef ons hoeveel plaaslike inwoners (ja, ook blankes!) is skuldig aan velerlei vorme van kriminaliteit? Ons mag nie saam met die massas (en kom ons wees eerlik met mekaar – veral rassisitiese blankes) summier aanvaar dat dit buitelanders is wat hoofsaaklik betrokke is by kriminaliteit nie, want dan is ons as gelowiges ook o.a. besig om vreemdelinge-haat aan te blaas ~ Verder, broers, alles wat waar is, alles wat edel is, alles wat reg is, alles wat rein is, alles wat mooi is, alles wat prysenswaardig is- watter deug of lofwaardige saak daar ook mag wees- daarop moet julle julle gedagtes rig (Fil.4:8).

• Ons moet besef dat ons land, nes die res van die wêreld, vasgevang is in die greep van die sondeval en dat ons meer en meer brutaliteit, kriminaliteit, bedrog, ens. sal beleef namate die koms

van ons Verlosser nader.

• Ons as gelowiges glo tog immers aan God se soewereiniteit en daarom moet ons al hierdie dinge ook in daardie lig beskou – God ís inderdaad in beheer en ons moet ons aan Sy soewereine wil onderwerp. Ons leef in “die alreeds en die nog nie” – ons Here is nou reeds die Heerser en Koning van hierdie wêreld en Hy voer nou reeds heerskappy oor die konings (ook Pres. Zuma en Malema) van hierdie wêreld ~ Op sy klere, by sy heupe, was daar 'n Naam geskrywe: "Die Koning van die konings en die Here van die heersers (Openb. 19:16). Hiermee saam kan ons ook Ef.1:21-22 lees ~ …hoog bo elke mag en gesag, elke krag en heerskappy, en wat daar ook al sprake van mag wees, nie net in hierdie bedeling nie, maar ook in die bedeling wat kom. Ja, aan Hom het God alles onderwerp, Hom bo alles verhef en Hom aangestel as hoof van die kerk.

• Ons as gelowiges moet ook ons stem dik maak teen xenofobie – ons kan en mag nie maar net swyg hieroor nie.

• Ons as gelowiges moet ook ’n hand van liefde, ondersteuning en hulp uitsteek aan mense wat deurloop onder xenofobie.

• As gelowiges mag ons nie in vrees leef nie ~ Want God het ons nie ’n gees van vreesagtigheid gegee nie, maar van krag en liefde en selfbeheersing (2 Tim.1:7). Die probleem met vrees is dat dit ’n mens kan verteer en vernietig; dit verblind ’n mens en jy kan nie meer rasioneel dink nie en in die proses word God se Woord wat as bemoediging en vaste anker moet dien, uit ons lewe gerangeer lê dit in die vergetelheid begrawe. Stacey Reaoch (“Desiring God” se BLOG - www.desiringgod.org/articles/when-fear-seizes-you) het hierdie volgende 7 wenke aan die hand gedoen om vrees teë te werk:

- God se Waarheid: Vra jouself af of dit wat jy bedink en wat jy in jou geestesoë sien, werklik aan die gebeur is, of is dit net my verbeelding? Paulus moedig ons aan om onder alle omstandighede die Waarheid na te jaag (Fil.4:8).

- God se Teenwoordigheid: Ons kan en moet ons troos daarin vind dat ons nooit alleen is nie (Ps.46:1).

- God se Genade: God belowe dat Hy onder alle omstandighede ons sal oorlaai met Sy genade (2 Kor.12:9).

- God se Soewereiniteit: God is te alle tye in beheer van ons lewe (Dan.4:34-35).

- God Luister: Stort jou hart uit voor God in gebed – Hy hoor ons gebede (Ps.40:1).

- God kan Vertrou word: Vroeg en laat jaag my teëstanders my, en ek het baie vyande, o Allerhoogste. Die dag as ek bang word, vertrou ek net op U (Ps.56:3-4).

- God se Groter Plan: Ons weet dat God alles ten goede laat meewerk vir dié wat Hom liefhet, dié wat volgens sy besluit geroep is (Rom.8:28) o – glo hierin en hou hieraan vas.

• Al is hierdie bedreiging ook ’n bedreiging wat in die toekoms ’n realiteit vir ons as wit gelowiges kan raak, moet ons steeds ’n ewigheidsperspektief koester – soos iemand eenkeer gesê het: “Sudden death, sudden glory”. Ons moet onsself al minder en minder blindstaar teen die dinge van hierdie wêreld en meer en meer dink aan ons ewige bestemming – hierdie lewe is maar net ’n kort deurgang na ’n ewige heerlikheid. Randy Alcorn (in sy boek “Heaven”) stel dit baie mooi wanneer hy sê: In Genesis 3, the earth’s first radical transition (mankind’s fall and first judgement) can be seen as one bookend of human history. In Revelation 20, we see the second bookend in the earth’s last radical transition (Christ’s return and last judgement)…” Hierdie lewe op aarde is inderdaad slegs ’n baie

kort deurgang na die ewige heerlikheid!

• As gelowiges moet ons besef dat ons geroep is om vir Christus in hierdie wêreld te ly , want slegs deur lyding kan die Koninkryk gevestig word ~ Dit is oor U dat die dood ons dag vir dag bedreig, dat ons soos slagskape behandel word (Rom.8:36) , maar ons moet altyd besef dat ons, …meer as oorwinnaars is deur Hom wat ons liefhet (Rom.8:37) en boweal, die dood kan ons nie van Hom skei nie.

• As gelowiges moet ons bid vir ons naaste EN vir ons vyande ~ Maar Ek sê vir julle: Julle moet

julle vyande liefhê, en julle moet bid vir dié wat vir julle vervolg, sodat julle kinders kan wees van julle Vader in die hemel. Hy laat immers sy son opkom oor slegtes en goeies, en Hy laat reën oor dié wat reg doen en oor dié wat verkeerd doen (Matt.5:44-45). Hoe moet ons bid vir ons vyande? Vir bekering? Ja vir bekering in die eerste plek, maar indien ons vyande nie uitverkies en geoormerk is vir redding nie, moet ons bid vir ’n hartsverandering; vir ’n gesindheidsverandering.

• Ons kan en moet verder vir die owerhede bid, hulle wie deur God oor ons aangestel is (Rom.13:1-2; 1 Tim.2:1-2 en 1 Pet.2:13-14 – ja selfs al voer hulle nie God se wil uit nie – 1 Pet.2:18-19), sodat o.a…:

- Die inwoners van ons land waarlik deur hulle gedien sal word (dit sluit vreemdelinge in wie verblyfreg hier het – en moenie vir een oomblik dink dat alle vreemdelinge in die land onwettig hier is nie).

- Die inwoners van die land… ~ …’n rustige en stil lewe kan lei in volkome toewyding aan God en in alle eerbaarheid (1 Tim.2:1-3).

- Die inwoners wet en orde en geregtigheid sal ervaar (Spr.8:15).

• Ons moet besef dat ons geroep is vir ’n tyd soos hierdie en daarom moet ons, ons Lig laat skyn – mense rondom ons moet die Koninkryk van Christus Jesus deur en in ons sien.

6. AFSLUITING:

Ons lees in Ester 4:14 van Ester ~ …and who knoweth whether thou art not come to the kingdom

for such a time as this (ASV). Soos Ester van ouds moet ons besef dat ons nie om dowe neute hier aan die suidpunt van Afrika geplaas is nie – dit is nie om dowe neute dat sommige van ons se voorgeslagte vir hul geloof uit Wes-Europa gevlug het en hul tuiste hier kom vind het nie. God se plan is dat Sy kinders (ons) gesuiwer moet word en dat Sy Koninkryk moet kom en dit sal en moet noodwendig gepaard gaan moet swaarkry – dit gaan dus nie oor ons “lekker kry, sukses en voorspoed” nie (in teenstelling met die “Voorspoeds-teologie”). Ons het ’n roeping om hier uit te leef en dit is om Christus Jesus na te volg en uit te leef ~ Now I rejoice in my sufferings for your sake, and fill up on my part that which is lacking of the afflictions of Christ in my flesh for his body's sake, which is the church (Kol 1:24 – ESV). Jesus het ook in Matt.10:38 gesê ~ Hy wat nie sy kruis opneem en My volg nie, is nie werd om aan My te behoort nie. Hierdie lewe op aarde is vir gelowiges dus nié ’n “Sondagskoolpiekniek” nie – dink aan wat Jesus alles deurgemaak het om ons los te koop – en Hy sê vir ons om Hom in daardie lyding na te volg!

Ek wil graag afsluit met Conrad Mbewe se woorde in die gedeelte wat hy verlede week geskryf het: “Our greatest problem is not that we are broken or sick. Our greatest problem is that the God of the universe is righteous in his holy anger, and he is coming to pour out His divine wrath on all who do not worship Him as God. The Biblical Gospel tells us that the Good News is far better than the fact that we will be made healthy and wealthy (even though this will be true of all believers in the new heavens and the new earth). The Biblical Gospel tells us that we get God as our treasure. We get to worship God as God. He sets us free from all other posers that promised joys they could never provide. Dan sluit Conrad af met ’n aanhaling deur ene Ken Mbugia wat gesê het, ‘Africa needs the Gospel more than it needs food aid. We need the Gospel more than we need democracy. The prosperity we need the most is not offered by the American dream’.

Afrika, Zuma, die EFF, vreemdelinge, aanvallers op vreemdelinge, Suid-Afrika, het Jesus Christus nodig ~ …and who knoweth whether thou art not come to the kingdom for such a time as this (Ester 4:14 – ASV).

Ons Geloofshoekpenne

1. SOLI DEO GLORIA - DIE EER VAN GOD ALLEEN Alles wat God beplan het en in die geskiedenis uitvoer (niks wat is of gebeur, is uitgeslote nie), het een finale doelwit, nl. om Homself te verheerlik. Die najaging van hierdie doel is dan ook elke mens se hoogste en onontkombare roeping. Om vir jouself te leef, is die wese van sonde

2. SOLUS CHRISTUS - CHRISTUS ALEEN Hierdie genade wat God aan miljoene sondaars deur alle eeue betoon het, was nog altyd volledig gebaseer op die volmaakte middelaarswerk van Sy Seun, Jesus Christus, en daarop alleen.

3. SOLA SCRIPTURA - DIE HELE SKRIF EN NET DIE SKRIF Die hele Bybel, en net die Bybel, is God se besondere en geïnspireerde openbaring aan die mens. Daarom is dit algeheel betroubaar en die universeel gesagvolle norm vir leer en lewe.

4. SOLA GRATIA - GENADE ALLEEN As 'n sondaar gered word, dan is dit geheel-en-al te danke aan God se vrye genade, en daaraan alleen.

5. SOLA FIDE - GELOOF ALLEEN God verklaar enige en elke sondaar regverdig wanneer die vanuit sy of haar geestelike en morele bankrotskap volledig op die middelaarskap van Jesus Christus staat maak ten einde vir God aanvaarbaar te wees. Daar is geen ander manier om met God versoen te word nie. Geen menslike verdienste, van watter aard ook al, kan Christus se verdienste aanvul nie; trouens, die Woord waarsku uitdruklik dat enige poging daartoe diskwalifiserend is.

Wat Glo ons?

DIE WAARHEID MAAK VRY!

Watter waarheid maak vry?
1. Daar is maar net een waarheid en dit is die waarheid soos opgeteken in die onfeilbare Woord van die Drie-Enige God (“Die hele Skrif is deur God geïnspireer en het groot waarde om in die waarheid te onderrig, dwaling te bestry, verkeerdhede reg te stel en ŉ regte lewenswyse te kweek” - 2 Tim 3:16).

2. Ons glo voorts dat die geskrifte van die Ou- en Nuwe Testament, God se besondere openbaring aan die mens is; dat dit, soos oorspronklik neergeskryf, ten volle deur God geïnspireer is; dat hierdie openbaring (die kanon) afgesluit en genoegsaam is; dat dit volkome betroubaar is m.b.t. leer en inhoud; en dat dit die hoogste en finale gesag is vir geloof en lewe (2Tim.3:15-17; Jes.8:20; Luk.16:29-31; Ef.2:20; Rom.1:19-21; Rom.2:14-15; Ps.19:1-3; Hebr.1:1; Spr.22:19-21; Rom.15:4; 2Pet.1:19-20).

3. Ons glo in die enigste en ewige Drie-enige God: Vader, Seun en Heilige Gees – soos Hy Homself in al Sy verhewe heerlikheid in die Heilige Skrif aan ons openbaar (Deut.6:4; Jer.10:10; 1Kor.8:4-6; 1Tes.1:9; Matt.28:19; 2Kor.13:14).

4. Ons glo dat God alle dinge geskape het, met die mens as kroon en rentmeester van Sy skepping. Die eerste mens, Adam, het in sonde geval en so sy oorspronklike geregtigheid verloor. So het hy homself en die hele skepping in ellende gedompel. Dit geld besonderlik sy nageslag (die ganse mensheid), wat sedertdien in verlore toestand onder God se toorn verkeer. Gevolglik het alle mense, reeds vanaf ontvangenis en geboorte, deel aan die erfsonde, wat enersyds die erfskuld (juridies skuldige toestand onder die oordeel van God) en andersyds die erfsmet (moreel verdorwe toestand van sondegeneigdheid) behels. Die gevalle mens is dus geestelik dood en sonder die lewendmakende herskeppingswerk van die Heilige Gees is dit totaal buite sy vermoë om die Evangelie te verstaan, in Christus te vertrou, van sonde te bekeer, God lief te hê en Hom te gehoorsaam (Gen.1:31; Kol.1:16; Rom.3:23; 5:12; Titus 1:15; Gen.6:5; Jer.17:9; Rom.3:10-19; 5:12-19; 1Kor.15:21, 22, 45, 49; Ps.51:7; Job 14:4; Ef.2:3; Rom.6:20; 5:12; Hebr.2:14-15; 1Tes.1:10).

5. Ons glo in Jesus Christus, God se Seun, wat ontvang is van die Heilige Gees en uit die maagd Maria gebore is as volkome God en volkome mens vir ewig. Hy het as God se Groot Profeet, Priester en Koning na hierdie wêreld gekom. Hy is Hoof van die uitverkore mensheid en God se hoogste en finale openbaring aan die mens (Matt.1:22-23; Luk.1:27, 31, 35; Rom.1:3-4; Fil.2:6-11; Kol.2:9).

6. Ons glo in Jesus Christus as enigste Middelaar tussen God en sondaars. Hy is gekruisig en het gesterf ten einde hulle van die heerskappy en gevolge van hul sonde te verlos. Hy het in volmaakte gehoorsaamheid onder die Wet gelewe sodat Sy geregtigheid aan hulle toegereken kan word. Hulle kry nie deel aan hierdie dubbele verlossingsgenade van God op grond van enige eie verdienste nie, maar dit word aan hulle toegereken deur geloof alleen. Hierdie geloof is nie bloot regsinnige opinie nie, maar is, vanuit diep bewussyn van eie onwaardigheid, lewenslange en uitsluitende vertroue in Jesus Christus wat as Versoeningsoffer die Vader se heilige geregtigheid volkome bevredig het. Geloof is enersyds soewereine gawe van God, gewerk deur Sy Gees; dit is andersyds verantwoordelikheid en werklike handeling van die mens self. Tussen hierdie twee kante van geloof is daar ten diepste geen teenstrydigheid nie (Joh.5:39; 14:6; Hand.4:12; Rom.5:12-19; 1:2-4, 16-17; 11:33-36; Ef.2:8-9; 3:1-14; Openb.5:9-10; 7:10; Rom.4:16, 23-25; Ps.110:3; Joh.6:37, 44; Hand.13:48; 16:14).

7. Ons glo in Jesus Christus se persoonlike, liggaamlike en historiese opstanding uit die dood; in Sy hemelvaart; en in Sy huidige heerskappy ter wille van Sy mense en om alles aan Hom te onderwerp (Hand.1:3; 2:33; 13:38-39; 1Kor.15:3-6; Gal.3:16-22; Ef.1:10; Kol.1:20).

8. Ons glo in die persoonlike wederkoms van Jesus Christus (Hand.10:42; Rom.14:9-10; 1:11; 2Pet.2:4).

9. Ons glo dat Jesus Christus deur die werk van die Heilige Gees vir Hom ewige volk uit die ganse mensdom versamel, ongeag ras, geslag of stand. Elkeen wat hieraan deel het, toon die egtheid daarvan deur volhardende gehoorsaamheid aan Hom (Joh.17:2-5; 2Kor.5:18-19; 1Pet.1:3-4; Joh.1:12-13; 1Kor.2:6-16; 1Joh.5:1).

10. Ons glo in die Heilige Gees. Hy het op die Pinksterdag as Parakleet (Trooster / Voorspraak / Helper) vanaf die Vader en die Seun na die Nuwe Testamentiese gemeente gekom. Sedertdien woon Hy in alle ware gelowiges om die Seun se Middelaarswerk en regering in hulle te verwerklik. Sodoende verheerlik Hy Jesus Christus in en deur gelowiges en is Hy die waarborg dat hulle hul volle erfenis as God se kinders uiteindelik sal ontvang. Hy lei elkeen van hulle, sonder opheffing van hul verantwoordelikheid of gehoorsaamheidsvolharding, na die finale afronding van hul verlossing d.m.v. die Woord en die genademiddele wat daarmee saamhang. Sonder Sy wederbarende verligtende, versekerende, heiligmakende en toerustende werk is ware Christenskap en kerkwees totaal onmoontlik (Hand.2:39; Rom.8:9, 14, 17, 23, 26; Luk.11:13; Ef.1:13-14; 4:30; 5:18-21; 1Kor.12:4-11; 12-13; 2Kor.3:18; Kol.3:10; Joh.14:16-18, 26; Gal.5:16-26; 1Tes.5:19).

11. Ons glo in die liggaamlike opstanding uit die dood van alle mense – diegene wat in Christus gesterf het om deel te hê aan die ewige saligheid en die res om deel te hê aan die ewige verdoemenis (Rom.1:4; 4:25; 6:5; 1Pet.1:3; 1Kor.15:12-21, 20-21; Matt.27:53; Hand.1:21; 2:31; 3:21).

12. Ons glo dat Jesus Christus alle ware gelowiges (en net hulle) beveel om Hom van plek tot plek gesamentlik in gemeenteverband te dien volgens die riglyne wat Hy daarvoor in die Skrif neerlê, Elke gelowige is dus verantwoordelik om hom, indien enigsins moontlik, by ’n gemeente te voeg waar die Here in gees en waarheid gedien word; om hom aan die broers en susters toe te wy; en om hom aan die gepaardgaande dissipline te onderwerp. So ’n plaaslike gemeente staan slegs onder die gesag van Jesus Christus, maar benodig tog vir sy welsyn gemeenskap met ander gemeentes waar die Here ook in gees en waarheid gedien word (Hand.2:42-47; 20:7; Ps.119:148; Matt.6:6; 18:15-20; 1Kor.12:12-27; Ps.84; Hebr.10:25; Rom.1:7; Ef.1:20-22).

13. Ons glo dat Jesus Christus die Doop en die Nagmaal ingestel het en dat dit deur alle ware gelowiges (en net hulle) in gehoorsaamheid en as belydenis onderhou moet word as heenwysing na die mees basiese aspekte van hulle geloof en verlossing. Die Doop is die onderdompeling van die gelowige in water as belydenis van sy identifisering met Jesus Christus in Sy dood, begrafnis en opstanding. Die Nagmaal is die deelname aan die brood en die beker wat wys op Jesus Christus se versoeningsoffer, naamlik Sy gebroke liggaam en gestorte bloed (Hand.2:37-41; 8:12-13, 36-38; 9:18; 10:47-48; 11:16; 15:9; 16:14-15, 31-34; 18:8; 19:3-5; 22:16; 1Pet.3:21; Rom.6:3-4; Gal.3:27; Kol.2:12; 1Pet.3:21; Hebr.9:25, 26, 28; 10:22; Matt.7:6; 15:9; 26:26-28; 28:19-20; Joh.3:23; 6:29, 35,47-58; 1Kor.10:1-2, 16, 17, 21; 11:23-29; 2Kor.6:14-15; Eks.20:4-5; ).

OPE BRIEF AAN DIE N.G. KERK

(Meer as 3000 kopiee van hierdie brief is uitgestuur na alle beskikbare E-Posadresse in die N.G. Kerk)

2012-05-04

Geagte Broeder

Na baie gebed en besinning rig ek hierdie brief aan u en ’n klompie ander broeders in die N.G. Kerk en vra dat u hierdie brief biddend sal lees en met ’n oop gemoed daarna sal kyk.

Ek is tans ’n predikant in die Vaaldriehoek Gereformeerde Baptistegemeente en het teologie studeer aan die Potchefstroomse Universiteit vir C.H.O. Voor ek voltyds in die bediening betrokke geraak het, was ek baie lank ’n onderwyser waarvan 12 jaar as skoolhoof. Ek en my vrou was ook baie jare lidmaat van die N.G. Kerk, maar is in 1984, toe die N.G. Kerk nog gestaan het op hul belydenisskrifte, onder sensuur geplaas en afgesny van ’n N.G.-gemeente in Ermelo omdat ons, nadat ons waarlik tot wedergeboorte gekom het, oortuig geraak het van die doop van gelowiges (die kredodoop) en ons laat doop het. Ons het deur die jare heen hegte vriendskapsbande met N.G.-lidmate gehad (en het nog steeds) – lidmate wat waarlik die Here Jesus Christus as Saligmaker navolg (beide "kredo- en paedodopers").

Ek glo met 'n gebroke hart dat 'n skokkende groot deel van die institusionele kerk van ons dag grootliks koers verloor het, in sekere gevalle selfs reddende geloof versaak het, en dringend nodig het om onverwyld en met hartstog terug te keer na die fundamentele geloofsvertrekpunte van die Reformasie: die Skrif alleen, genade alleen, Christus alleen, geloof alleen, die eer van God alleen. Ek onderskryf die histories-gerespekteerde en internasionaal-erkende 1689 Baptiste Belydenis - soos meeste reformatoriese (gereformeerde) Baptiste oor die wêreld heen, asook die Belydenisskrif en Kernwaardes van Sola 5, 'n assosiasie van Godgesentreerde evangeliese gemeentes en gelowiges in (tans) agt lande in Suider-Afrika

Waarom rig ek hierdie brief aan u? Die afgelope jaar of drie, maar veral die afgelope jaar het ek intens bewus geraak van ernstige dwaalleer wat posgevat het in die N.G. Kerk en ek is intens besorg oor broers en susters in die Here Jesus Christus wat in die N.G. Kerk is. Ek kry van tyd tot tyd te doen met predikante in u denominasie en ek ervaar intense bekommernis en selfs verwarring by van hulle (veral jongeres).

Ek het ook bevriend geraak met heelwat N.G.-lidmate en ’n paar predikante op "Facebook" en kon ek sommige van die debatte wat gevoer word tussen regsinnige lidmate en –predikante aan die eenkant en "nuwe hervormers"/"verligtes"/"liberales"/"vrydenkers" aan die anderkant. My simpatie met die "behoudendes" aan die eenkant en my skok en ontnugtering in predikante wat in my oë bykans niks meer van die Woord van God glo nie, het a.g.v. hierdie debatte, net nog verder verdiep.

Wat ek nie kan verstaan nie, is dat die N.G. Kerk oënskynlik die wil en vermoë verloor het om op te tree teen teoloë, ampsdraers en predikante wat nie meer volgens die Belydenisskrifte en die Woord van God optree nie en derhalwe in my oë dwaalleraars geword het (Openb.2:14-15; 1 Tes.5:14; 2 Tim.4:2-5; Deut.13:5; 1 Kor.5:11, 13; Titus 1:9; e.a.). In die lig van Ferdie Mulder se boek, asook dit wat ek in die pers, persoonlike Blogs en "Facebook" lees, kan ek nie anders as om te dink dat die gesagstrukture van die N.G. Kerk reeds deur die "nuwe hervormers" gekaap is en daarom dat niks gedoen word aan persone/lidmate wat die Kerk van die Here Jesus Christus intens skade berokken nie.

Ek kan bv. nie verstaan hoe ’n persoon soos Jean Oosthuizen steeds maar net toegelaat word in sy posisie by die Kerkbode, terwyl hy blatant voortgaan om mense (insluitende myself) te belaster, te beledig, te verkleineer en geen standpunt inneem teen dwaalleer nie – hy maak ’n openlike bespotting van God Drie-Enig, ens. (Titus 1:16; e.a.). Hy gebruik baie dikwels kru taal teenoor mense wat opgevoede heidene nie eens sal gebruik nie (’n voorbeeld van een van die "Facebook" drade wat hierdie feite bevestig kan op versoek verskaf word) en dan praat ek nie eens van sy persoonlike "Facebook-muur" nie! Christene wat sterk van hom op Facebook verskil, word summier geblok, maar ateïste word ‘n vry hand gegee om God te laster. Dit lyk na ‘n eensydige skending van spraakvryheid.

Ek staan verstom en geskok oor sommige predikante se uitsprake oor die hel (wat kwansuis nie bestaan nie – Matt.5:22; Mark.9:47-48; 1 Tim.1:19-20; e.a.); die feit dat Satan nie ’n werklikheid is nie (Jak.4:7; 1 Pet.5:8; e.a.); geen sondeval nie (Gen.3; 1 Joh.1:6, 8; e.a.); dat Jesus nie uit ’n maagd gebore is nie (Matt.1:18; Luk.1:34; e.a.); die feit dat Christus nie uit die dood opgestaan het nie (Luk.24:36; Joh.20:27; e.a.); dat Jesus Christus nie aan die regterhand van God die Vader sit nie (Mark.16:19; e.a.); die skepping; Jona en Noag wat mitologiese verhale is; uitsprake wat positief is oor die "emergent church", panenteïsme, homoseksualitiet, ens. ens. My vraag is, hoe die N.G. Kerk steeds kan toelaat dat die gewone lidmaat (geredde en soekendes) wat op soek is na ’n ware en intieme verhouding met Jesus Christus en groei in heiligmaking, blootgestel kan word aan sulke predikante en selfs ’n moderator? Manne soos Nelus Niemandt; ’n Albert Cruywagen; Gerhard Bothma; Ben du Toit en talle teologiese professore en andere? Ek wil nie eers kommentaar lewer op sommige sinodale besluite nie.

Ek wil nie eers kommentaar lewer op sommige werklik-ontstellende Algemene Sinode- besluite nie.

Aan die begin van hierdie jaar, toe ek ook Ferdie Mulder se boek "Opgestaan" gelees het, is dit wat ek ervaar, gehoor, gelees en vermoed het, opnuut bevestig en het ek net nog meer intens bewus geraak van wat in die N.G.K. aan die gang is en wat sommige van u as predikante, studente en talle lidmate moet ervaar. My hart het al meer begin pyn vir regsinnige (gereformeerde) broers en susters in die N.G. Kerk en het ek net nog dieper bewus geraak van die nood; die paniek; die verwarring; die pyn; ens. wat besig is om pos te vat by diesulkes. Ek is veral ook intens bekommerd oor "onskuldige" kinders wat "losgelaat" word in van die teologiese fakulteite waar N.G. predikante opgelei word.

Ek en ons gemeente is tans deel van "SOLA 5", ’n assosiasie van Evangeliese Christene in Suidelike Afrika en ek dien ook tans op die hoofbestuur van "SOLA 5". Die meeste van die predikante wat deel uitmaak van "SOLA 5" is Engelssprekende broers in die Here en hulle wil gedurig van my weet wat aan die gang is in Afrikaanse kerklike geledere en hoe ek dit sien. Ek self vra my daagliks die vraag af: Wat gaan hier aan? Wat kan ons doen – wat kan ek doen? Dit gaan tog immers hier oor die eer van God en die waarheid!

Die Skrif roep ons ernstig op om te waak teen dwaalleer, omdat dit mense weglei van die geopenbaarde waarhede. Dit is nie ‘n saak wat enige Christen by hom kan laat verbygaan nie (2 Pet.2:1-2; Titus 1:7-11; 2 Tes.2:15; e.a.).

My broeder in Christus, ek is intens bekommerd oor die Kerk in Suid-Afrika in die algemeen en dan spesifiek oor wat aan die gang is in die N.G. Kerk en ek bid dat die Here sal ingryp en Sy eer sal herstel. Ek wens so dat ek hande kon vat met u in hierdie stryd op vergaderings, forums, sinodes, ens., maar omdat ek nie lidmaat van die NGK is nie, kan ek nie en kan ek u maar net verseker van my voorbidding en dat ek waar moontlik my bydrae sal lewer.

Sterkte in die stryd – ek dink aan u!

U broeder in Christus Jesus.

Kobus van der Walt