.: Die Profeet Sagaria - 03 (“Tweede Naggesig – Die Horings en die Ystersmede”)

Sunday, November 16, 2014

Die Profeet Sagaria - 03 (“Tweede Naggesig – Die Horings en die Ystersmede”)

Vir Oudio-opname van Preek - sien regs bo op Spyskaart en volg verlangde skakel
1. SKRIFLESING:

Sagaria 1:18-21 ~ Ek het weer ’n gesig gesien. Daar was vier horings, ¹⁹en ek het vir die engel wat vir my die gesig moes uitlê, gevra: “Wat beteken dit?” Hy het vir my gesê: “Dit is die horings wat vir Juda, Israel en Jerusalem verstrooi het.” ²⁰Toe laat die Here my vier ambagsmanne sien, ²¹en ek vra: “Wat het hulle kom doen?” Hy het geantwoord: “Daardie horings het die mense van Juda verstrooi en verneder. Die ambagsmanne het gekom om die regeerders van die nasies, die horings wat vir Juda met soveel geweld verstrooi het, die skrik op die lyf te ja en hulle tot ’n val te bring.”

2. INLEIDING:

Hierdie tweede naggesig van Sagaria, is die kortste van die agt gesigte wat Sagaria gedurende die nag van, 15 Februarie 519 v.C. ontvang en is deel van die eerste van drie orakels.

Soos wat ek verlede week aangetoon het, beskik hierdie naggesig ook oor dieselfde struktuur, nl.:

· 'n Inleiding;

· Besonderhede oor die gesig en...

· Die verklaring wat die engel aan hom verskaf.

In die eerste gedeelte van die orakel waarna ons verlede Sondag gekyk het, het ons gesien dat die Engel op die perd (ons het gesien dat dit Jesus self was), God se belofte oorgedra het aan die volk deur Sagaria en dat Hy die Israeliete weer gaan seën, terwyl Hy die nasies gaan straf wat hulle mandaat oorskry het toe hulle die volk van die Here buitemaat, vervolg het. Hierdie laasgenoemde aspek t.o.v. God se oordele oor die heidense volke, word nou in hierdie tweede naggesig van die horings en die ambagsmanne, in groter detail beskryf. Ons moet besef dat hierdie gesig nie maar net ŉ voortsetting is van die eerste nie, maar ŉ aparte en tweede gesig en dit sien ons in die woorde van die profeet wanneer hy sê ~ Ek het weer ’n gesig gesien (v.18).

Die OAV en die Engelse vertalings vertaal hierdie vers met ~ En ek het my oë opgeslaan en gekyk en ons vind hierdie selfde uitdrukking, elke keer voor die volgende naggesig wat Sagaria ontvang het.

3. BESONDERHEDE OOR DIE GESIG (vv.18-21):

· Die vier Horings (vv.18-19a):

Regdeur die Ou Testament en in die kulturele konteks van die Midde Ooste, het horings mag en krag gesimboliseer – veral as dit by koninklike mag gekom het.

Horings was nie net destyds, ŉ simbool van mag en krag nie – dit is vandag nog steeds letterlik die geval in die diereryk en daarom is dit so hartseer dat renosters deesdae deur sommige wildboere, onthoring word a.g.v. die slagting wat onder die resnosterbevolking plaasvind – dit is hartseer, want dit is m.b.v. die renosterbulle se horings dat hulle dominansie en leierskap van ŉ trop betoon, wanneer daardie posisie deur ŉ ander, of baie dikwels ŉ jong bul uitgedaag word. Dieselfde geld ook vir bokke, waar hulle baie dikwels tot die dood toe met hul horings baklei ten einde dominansie van die trop te behou of te verkry.

In Ou Testamentiese tye, sou daar ook olie uit ŉ bokhoring oor die kop en hare van ŉ nuwe koning, tydens sy kroningseremonie gegooi word. In 1 Sam.16:1 ontvang Samuel opdrag van God om ŉ horing vol olie te maak en na Bethlehem te gaan ten einde die volgende koning te salf en dan lees ons in 1 Sam.16:11-13 dat Samuel vir Isai sê dat die Here een van sy seuns gekies het om koning van Israel te word en toe Dawid uiteindelik voor Samuel verskyn – die laaste en jongste van Isai se seuns, toe sê die Here vir Samuel in vv.12-13 ~ “Staan op, salf hom, want dis hý.” ¹³Samuel het die horing met olie gevat en hom voor sy broers gesalf. Die Gees van die Here het van daardie dag af kragtig in Dawid gewerk.

In hierdie tweede naggesig van Sagaria sien hy vier horings en moet ons die simboliek van koninklike en nasionale mag hier in gedagte hou. Ons sal ook sien dat hierdie beeld van die vier horings, die sentrale kenmerk van hierdie bepaalde gesig is.

· Die vier ystersmede (v.20):

Die tweede beeld wat Sagaria in sy gesig sien, is dié van vier ambagsmanne, of soos die OAV dit vertaal, dié van vier ystersmede. Die Hebreeuse woord wat hier gebruik word, dui egter nie vir ons direk op dié van ystersmede nie, want die Hebreeuse woord kan vir allerlei ambagslui gebruik word (selfs bv. vir skrynwerkers), maar as ons in gedagte hou dat hierdie gesig na magtige “vier-horing-nasies en -konings” verwys en as ons kyk na 1 Kon.22:11 waar daar geskryf staan ~ Sedekia seun van Kenaäna het vir hom ’n paar horings van yster gemaak en gesê: “So sê die Here: Met hierdie horings sal u die Arameërs stoot tot dit klaar is met hulle”, kan ons aanvaar dat hierdie ambagslui weliswaar ystersmede was, hoewel dit nie belangrik is nie, omdat dit nie hier gaan oor watter tipe ambagslui hier van gepraat word nie. Wat egter wel van belang is, is die feit dat ambagslui nie deel uitgemaak het van die hoër sosiale groepering in die algemene volkslewe nie – hulle was derhalwe ook nie deel van die politieke elite, of senior offisiere in die weermag nie; hulle was ook nie akademies geskool nie.

Met hierdie twee beelde in gedagte – aan die eenkant magtige konings en volke wat uitgebeeld word deur die vier horings, maar in teenstelling daarmee die onbelangrike ystersmede, noop Sagaria om vir die engel te vra wat hierdie gesig beteken.

4. DIE VERKLARING:

· Die vier horings (v.19b):

In hierdie kort “vier-vers-Skrifgedeelte” van vanoggend, word die woord “horings” nie minder nie as vier keer gebruik en dit dui vir ons op die krag en mag van die volke en hoe hulle hierdie mag gebruik het.

V.19b gee vir ons verder ŉ baie besliste aanduiding van wie hierdie nasies was wie Sagaria in sy gesig gesien het – die engel sê vir Sagaria, dat hierdie horings die nasies was wat Juda, Israel en Jerusalem verstrooi het. Wat ons egter wel weet is dat daar eintlik net twee nasies of Ryke was wat verantwoordelik was vir die ballingskap en wegvoer van die volk van God, nl. Babilon, wat in Sagaria se tyd reeds gekom en gegaan het (Dan.2:36-39; 7:17), terwyl Daniël se “twee-horing” ram (Dan.8:10), nl. die Persiese Ryk, steeds in Sagaria se tyd en die tyd van hierdie naggesig, aan die bewind was en baie groot dele van die wêreld, waaronder Israel, beheer het.

Watter ander twee nasies het die ander twee horings dan verteenwoordig? Dit kon dalk die Egiptenare en die Grieke gewees het, want ons weet dat hierdie twee nasies ook vir Israel onderdruk het en Sagaria het ook in Sag.9:13 en 10:10-11 na hulle verwys. Die moontlikheid bestaan ook dat daar i.p.v. Egipte en Griekeland, na Sirië en Assirië verwys kon word, maar ook dit is nie klinkklaar duidelik nie. Dit was egter net Babilon en Persië wat die volk van die Here in ballingskap weggevoer het en daarom moet ŉ mens die versoeking weerstaan om volksname aan hierdie vier horings toe te ken. Die waarskynlikste verklaring wie deur hierdie vier horings verteenwoordig word, is bloot dan net dat die getal vier verteenwoordigend is van volke vanuit al vier die windrigtings wat teen Sy volk opgetree het en/of dalk nog in die toekoms teen hulle gaan optree – dit verwys dus na die ganse heidendom.

Hierdie uitgangspunt dat die getal vier hier bloot net simboliese taal is en nie verwys na vier spesifieke nasies nie, word beklemtoon deur Skrifgedeeltes soos bv. Jer.49:36 ~ Ek laat die vier winde losbreek teen Elam, die winde uit die vier hoeke van die hemelruim, Ek verjaag hulle al die windrigtings in; daar sal nie ’n nasie wees nie of van Elam se vlugtelinge sal daar beland. Ook Eseg.37:9 ~ Toe sê die Here vir my: “Praat nou as profeet met die gees, tree op as profeet, mens, sê vir die gees: So sê die Here my God: Kom uit die vier windstreke, gees, blaas in hierdie dooies in dat hulle kan lewe.”

· Die vier ystersmede (vv.21):

In v.21 gee die Engel aan Sagaria die verklaring vir die vier ystersmede en hierdie ystersmede gaan optree teen v.19b se vier horings.

Die feit dat die getal vier t.o.v. die horings, simbolies van aard is, impliseer dit dus dat die getal vier in die geval van die ystersmede, ook simbolies van aard moet wees, maar wat beteken dit dan?

Sagaria vra nie wie hierdie ystersmede is nie, maar dit is duidelik dat hulle nederige en gehoorsame diensknegte is, wie in diens van die Here staan en Sy wil uitvoer. Jer.23:29 gee vir ons ŉ verdere aanduiding na wie of wat hierdie smede verwys ~ My woord is soos vuur, sê die Here, soos ’n hamer waarmee klippe stukkend gebreek word. Dit is derhalwe duidelik, dat hierdie smede in opdrag van God optree en in die toekoms gaan optree, ten einde die vyande van God se volk te vernietig. Hierdie instrument is magtig, want dit word bemagtig en tree in opdrag van God se Woord – Sy opdrag, op. Dit is waarom God se volk in oorwinning lewe en optree. Dit is dan ook waarom Paulus in 2 Kor.10:4-5 sê ~ Die wapens van ons stryd is nie die wapens van die mens nie, maar die kragtige wapens van God wat vestings kan vernietig. Daarmee vernietig ons die redenasies ⁵en elke hooghartige aanval wat teen die kennis van God gerig word. Ons neem elke gedagte gevange om dit aan Christus gehoorsaam te maak.

Die belangrike hier is dus om net soos in die geval van die horings, nié die ystersmede te beperk tot een spesifieke nasie of koninkryk, of bepaalde mag nie. Hierdie smede verwys m.a.w. na enige mag of instrument in die hand van God en wat in opdrag van Sy Woord, deur die loop van die wêreldgeskiedenis, teen God se vyande optree, soos bv. die Romeinse Ryk wat net voor en na Christus se geboorte, as onderdrukkers van God se volk sou optree en natuurlik ook wêreldmagte wat dit ná Christus en ook in ons tyd en in die toekoms in ons nageslagte se tyd mag doen.

Hierdie boodskap wat Sagaria ontvang en wat hy aan die volk deurgegee het, was uniek in die opsig dat die vorige profete meestal spesifieke profesieë gebring het oor of teen spesifieke magte of gebeure, terwyl hierdie naggesig baie breed en nie spesifiek van aard is nie. Hier staan egter een ding soos ŉ paal bo water en dit is die feit dat God se komende oordeel onvoorwaardelik is en daarom vas en seker staan. Wanneer dit gaan plaasvind word nie aan Sagaria gesê nie, ook nie wie hierdie smede is nie. Wanneer dit gaan plaasvind en wie die instrumente in God se hand gaan wees, is dus nie die punt van hierdie gesig nie, maar dat dit wél gaan plaasvind – dít is die punt.

Daar is egter nog iets wat belangrik is om op te let en dit is die feit dat daar vir elke horing, ook ŉ ystersmid is – daar is vier horings, maar daar is ook vier smede en dit dui onteenseglik daarop dat daar ŉ instrument in God se hand is om ŉ ieder en elke optrede wat teen Sy volk uitgevoer is, of gaan word, met mag en krag te vernietig.

Sagaria sien die nederige ystersmede wat gereed is om die horings te vernietig, sodat God se geregtigheid kan seëvier. Die doel met hierdie gesig is dus om die volk se vertroue in God te versterk, asook die feit dat Hy reg en geregtigheid sal laat geskied. God wil vir die volk van die dag sê dat elke wêreldmag wat moontlik die herbou van die tempel verder sal wil vertraag of selfs vernietig, in die kiem gesmoor sal word en dat Hy geregtigheid sal laat geskied en weer in die volk se midde kom woon, maar Hy sê ook terselfdertyd dat Hy in die toekoms, Sy volk sal beskerm teen die aanslae van die vyand.

5. TOEPASSING:

Wat beteken hierdie tweede naggesig van Sagaria vir ons – het dit enige toepassing?

Deurgaans deur die geskiedenis was die feit baie duidelik dat God Sy geregtigheid laat geskied en dat Hy Sy kinders beskerm teen ongeregtigheid. In die vroeë Nuwe Testamentiese kerk het die vyande van Christus se Kerk, Sy goddelikheid in twyfel getrek en die Kerk in diskrediet gebring, maar die Here het ŉ man met die naam Athanasius opgerig (293-373 n.C.) wat die wêreld se aanslae beveg en die Kerk se saak onbeskroomd gestel het. Hy het geweldige vervolging deurstaan en uiteindelik die teologiese denkrigting van Arianisme, wat die Christendom wou teruglei na die heidendom, blootgelê en is hierdie aanslag teen die kerk afgeweer – “die horings” is afgebreek [Arianisme was ŉ teologiese denkrigting wat deur Arius (256-336 n.C.) geformuleer is, waardeur die Drie-Eenheid verwerp is].

Nagenoeg ŉ eeu later was daar weer die aanslag van Pelagianisme en ander dwaalleer en het die Here vir Augustinus opgerig en het hy met sy vlymskerp teologiese brein, hierdie dwaling aan flarde geskeur (Die uitgangspunt van Pelagius was dat die mens nie van nature dood is in sonde nie, maar dat hy homself kan reghelp op die pad van regverdigmaking. Die verlossing in Christus en die versoening deur Hom bewerk, is derhalwe nie nodig nie).

So het dit deur die eeue heen gegaan, maar die vyande van die Kerk is een na die ander ontbloot en vernietig, of is die gelowiges ten minste van hierdie vals leer gered en bewaar.

Hoe is hierdie dwaalleer beveg? Hoe is hierdie aanslag teen die Kerk beveg? Die wapens in die hande van die ystersmede was telkens en moet voortdurend in die toekoms ook, die Waarheid – die Woord van God wees. Kom ek herhaal weer wat Jeremia in Jer.23:29 sê ~ My woord is soos vuur, sê die Here, soos ’n hamer waarmee klippe stukkend gebreek word.

Die Woord van God is magtiger as enige ander wapen wat teen die Kerk (teen ons as gelowiges opgeneem kan word) en daarom sê Paulus ook in 2 Kor.10:4-5 ~ Ons verkondig nie onsself nie, maar Jesus Christus as die Here, en onsself as julle dienaars ter wille van Jesus. ⁶God wat gesê het: “Laat daar lig skyn uit die duisternis,” het ook in ons harte ’n lig laat skyn om ons te verlig met die kennis van die heerlikheid van God, wat van Jesus Christus uitstraal. ⁷Ons wat hierdie skat in ons het, is maar kleipotte wat maklik breek; die krag wat alles oortref, kom dus van God, nie van ons nie. ⁸In alles word ons verdruk, maar ons is nie teneergedruk nie; ons is oor raad verleë, maar nie radeloos nie; ⁹ons word vervolg, maar nie deur God verlaat nie, op die grond neergegooi, maar nie vernietig nie. ¹⁰Die sterwe van Jesus dra ons altyd saam in ons liggaam, sodat ook die lewe van Jesus sigbaar kan word in ons liggaam. Die Woord is die kragtigste wapen in die arsenaal van ŉ gelowige en daarom moet ons die Woord bestudeer en die Woord ken en die Woord toepas in en deur ons lewe, dit is waarom die Hebreërskrywer in Hebr.4:12 sê ~ Want die woord van God is lewend en kragtig en skerper as enige tweesnydende swaard, en dring deur tot die skeiding van siel en gees en van gewrigte en murg, en is ’n beoordelaar van die oorlegginge en gedagtes van die hart.

Die volk Israel het baie ongeregtigheid in hul lewe ervaar, maar net so ervaar ons as gelowiges net so dikwels, ongeregtigheid wat teen ons gepleeg word – of dit nou in die werkplek is, of deur mense wat ons gedink het vriende (of selfs familie) is. Baie gelowiges het al, ál hulle besittings verloor omdat hulle Jesus Christus as Saligmaker bely (dink maar weereens net aan die gelowiges wat deur die Islamitiese Staat – ISIS, vervolg word); baie het al hul besittings verloor, maar baie het selfs ook met hul lewens geboet. Verlede jaar alleen was daar na bewering 2 123 martelare wêreldwyd, teenoor die 1201 in 2012. Hierdie is baie konserwatief berekende getalle, terwyl daar navorsers is wat reken dat daar selfs meer as 8 000 martelare gemiddeld per jaar sterf vir hul geloof in Jesus Christus. Wie gaan hierdie onderdrukkers, vervolgers en moordenaars van gelowiges verantwoordelik hou? Dit lyk asof hulle maar net wegkom daarmee.

Die vraag is of mense wat onregverdig teenoor ons optree en ek praat nie net van martelaars nie, ek praat ook van “gewone” ongeregtigheid soos skinder, of diskriminasie in die werkplek omdat ek ŉ gelowige is, ens. – sal mense wat in ongeregtigheid teenoor ons optree – sal ook hulle soos in die tyd van Sagaria, aan die pen ry? Sal hulle “horings” ook deur God se ystersmede vernietig word?

Die feit is dat net soos wat die volk van die Here in Sag.1:18-21 hoop ontvang het en die praktiese implementering van die Here se beloftes gesien en ervaar het, net so bied God se Woord aan ons hoop en beloftes, dat God se geregtigheid een of ander tyd sál seëvier – Sy nederige ystersmede sal ook die “horings” in ons lewe vernietig, trouens daardie dag het reeds aangebreek met die koms van Jesus Christus. Vroeg in Jesus se bediening het Hy dit reeds bekend gemaak dat Hy gekom het om namens Sy dissipels (ons) op te tree teen ongeregtigheid en hy het dit in die Sinagoge in Jerusalem gesê, deur Jes.61:1-2a aan te haal ~ Die Gees van die Here is op My omdat Hy My gesalf het om die evangelie aan armes te verkondig. Hy het My gestuur om vrylating vir gevangenes uit te roep en herstel van gesig vir blindes, om onderdruktes in vryheid uit te stuur, ¹⁹om die genadejaar van die Here aan te kondig” (Luk.4:18-19).

Hierdie was deurgaans die tema van Jesus se bediening. Hy het geregtigheid gevestig deur nederigheid, diensbaarheid en opoffering en dit is wat ons ook deurgaans moet doen wanneer daar onregverdig deur die wêreld teen ons opgetree word – of ons nou beskinder word en of ons verneder word en of ons valslik beskuldig word, of ons verneuk word, of ons gedood word vir ons geloof, of wat ook al – staan jou man, maar doen dit deur jou getuienis ten alle tye uit te leef en op nederige en diensbare wyse jou getuienis voortdurend te bly uitleef en onthou deurgaans dat Jesus die spot en hoon en vervolging – tot die dood toe, van die wêreld verduur het, t.w.v. ons en wanneer ons iets van dieselfde van die wêreld ervaar – troos jou daaraan, dat dit jou geleentheid is om met Jesus te identifiseer.

Ek het verlede week twee teksverse aangehaal en ek wil dit weer vanoggend in hierdie konteks as vertroosting en bemoediging herhaal ~ ...En onthou: Ek is by julle al die dae tot die voleinding van die wêreld (Matt.28:20b). Hy daag ons egter ook voortdurend uit wanneer Hy sê ~ As iemand agter My aan wil kom, moet hy homself verloën, elke dag sy kruis opneem en My volg (Luk.9:23).

Geliefdes, die bewerkers van ongeregtigheid sal hulle dag van afrekening kry – dit is ŉ belofte van die Here – reeds in Sag.1:18-21 al. Die Woord sê dat hulle dae getel is, maar ons reaksie op hierdie bewerkers van ongeregtigheid moet altyd Christus gelykvormig wees. Ons val baie dikwels in die strik om onsself te regverdig en self dan op die troon van onderdrukking te sit en wil ons ŉ oog vir ŉ oog vergeld, maar ons mag dit nie doen nie – ons moet deurentyd geregtigheid najaag en geregtigheid vestig waar ons ook al is. Ons is ook vandag ystersmede in God se hand en ons moet saam met Christus as die hoof-Ystersmid, horings van ongeregtigheid vernietig, maar ons moet dit op ŉ Christus gelykvormige wyse doen, deur lief te hê, deur nederig te wees, deur vergewingsgesind te wees, maar om ook ten alle tye regverdig te wees en in die lig te wandel en sonde te ontbloot, ja ook die sonde van ongeregtigheid.

Soms lyk dit onmoontlik om ongeregtigheid “stukkend te slaan en te vernietig”, maar dan moet ons net onthou, soos reeds gesê, dat geregtigheid uiteindelik in God se hande lê, soos Paulus dit baie duidelik in Rom.12:19 stel ~ Moenie self wraak neem nie, geliefdes, maar laat dit oor aan die oordeel van God.

Boodskap deur Kobus van der Walt – Vaaldriehoek Gereformeerde Baptistegemeente (Drie Riviere) – Sondag 16 November 2014

Ons Geloofshoekpenne

1. SOLI DEO GLORIA - DIE EER VAN GOD ALLEEN Alles wat God beplan het en in die geskiedenis uitvoer (niks wat is of gebeur, is uitgeslote nie), het een finale doelwit, nl. om Homself te verheerlik. Die najaging van hierdie doel is dan ook elke mens se hoogste en onontkombare roeping. Om vir jouself te leef, is die wese van sonde

2. SOLUS CHRISTUS - CHRISTUS ALEEN Hierdie genade wat God aan miljoene sondaars deur alle eeue betoon het, was nog altyd volledig gebaseer op die volmaakte middelaarswerk van Sy Seun, Jesus Christus, en daarop alleen.

3. SOLA SCRIPTURA - DIE HELE SKRIF EN NET DIE SKRIF Die hele Bybel, en net die Bybel, is God se besondere en geïnspireerde openbaring aan die mens. Daarom is dit algeheel betroubaar en die universeel gesagvolle norm vir leer en lewe.

4. SOLA GRATIA - GENADE ALLEEN As 'n sondaar gered word, dan is dit geheel-en-al te danke aan God se vrye genade, en daaraan alleen.

5. SOLA FIDE - GELOOF ALLEEN God verklaar enige en elke sondaar regverdig wanneer die vanuit sy of haar geestelike en morele bankrotskap volledig op die middelaarskap van Jesus Christus staat maak ten einde vir God aanvaarbaar te wees. Daar is geen ander manier om met God versoen te word nie. Geen menslike verdienste, van watter aard ook al, kan Christus se verdienste aanvul nie; trouens, die Woord waarsku uitdruklik dat enige poging daartoe diskwalifiserend is.

Wat Glo ons?

DIE WAARHEID MAAK VRY!

Watter waarheid maak vry?
1. Daar is maar net een waarheid en dit is die waarheid soos opgeteken in die onfeilbare Woord van die Drie-Enige God (“Die hele Skrif is deur God geïnspireer en het groot waarde om in die waarheid te onderrig, dwaling te bestry, verkeerdhede reg te stel en ŉ regte lewenswyse te kweek” - 2 Tim 3:16).

2. Ons glo voorts dat die geskrifte van die Ou- en Nuwe Testament, God se besondere openbaring aan die mens is; dat dit, soos oorspronklik neergeskryf, ten volle deur God geïnspireer is; dat hierdie openbaring (die kanon) afgesluit en genoegsaam is; dat dit volkome betroubaar is m.b.t. leer en inhoud; en dat dit die hoogste en finale gesag is vir geloof en lewe (2Tim.3:15-17; Jes.8:20; Luk.16:29-31; Ef.2:20; Rom.1:19-21; Rom.2:14-15; Ps.19:1-3; Hebr.1:1; Spr.22:19-21; Rom.15:4; 2Pet.1:19-20).

3. Ons glo in die enigste en ewige Drie-enige God: Vader, Seun en Heilige Gees – soos Hy Homself in al Sy verhewe heerlikheid in die Heilige Skrif aan ons openbaar (Deut.6:4; Jer.10:10; 1Kor.8:4-6; 1Tes.1:9; Matt.28:19; 2Kor.13:14).

4. Ons glo dat God alle dinge geskape het, met die mens as kroon en rentmeester van Sy skepping. Die eerste mens, Adam, het in sonde geval en so sy oorspronklike geregtigheid verloor. So het hy homself en die hele skepping in ellende gedompel. Dit geld besonderlik sy nageslag (die ganse mensheid), wat sedertdien in verlore toestand onder God se toorn verkeer. Gevolglik het alle mense, reeds vanaf ontvangenis en geboorte, deel aan die erfsonde, wat enersyds die erfskuld (juridies skuldige toestand onder die oordeel van God) en andersyds die erfsmet (moreel verdorwe toestand van sondegeneigdheid) behels. Die gevalle mens is dus geestelik dood en sonder die lewendmakende herskeppingswerk van die Heilige Gees is dit totaal buite sy vermoë om die Evangelie te verstaan, in Christus te vertrou, van sonde te bekeer, God lief te hê en Hom te gehoorsaam (Gen.1:31; Kol.1:16; Rom.3:23; 5:12; Titus 1:15; Gen.6:5; Jer.17:9; Rom.3:10-19; 5:12-19; 1Kor.15:21, 22, 45, 49; Ps.51:7; Job 14:4; Ef.2:3; Rom.6:20; 5:12; Hebr.2:14-15; 1Tes.1:10).

5. Ons glo in Jesus Christus, God se Seun, wat ontvang is van die Heilige Gees en uit die maagd Maria gebore is as volkome God en volkome mens vir ewig. Hy het as God se Groot Profeet, Priester en Koning na hierdie wêreld gekom. Hy is Hoof van die uitverkore mensheid en God se hoogste en finale openbaring aan die mens (Matt.1:22-23; Luk.1:27, 31, 35; Rom.1:3-4; Fil.2:6-11; Kol.2:9).

6. Ons glo in Jesus Christus as enigste Middelaar tussen God en sondaars. Hy is gekruisig en het gesterf ten einde hulle van die heerskappy en gevolge van hul sonde te verlos. Hy het in volmaakte gehoorsaamheid onder die Wet gelewe sodat Sy geregtigheid aan hulle toegereken kan word. Hulle kry nie deel aan hierdie dubbele verlossingsgenade van God op grond van enige eie verdienste nie, maar dit word aan hulle toegereken deur geloof alleen. Hierdie geloof is nie bloot regsinnige opinie nie, maar is, vanuit diep bewussyn van eie onwaardigheid, lewenslange en uitsluitende vertroue in Jesus Christus wat as Versoeningsoffer die Vader se heilige geregtigheid volkome bevredig het. Geloof is enersyds soewereine gawe van God, gewerk deur Sy Gees; dit is andersyds verantwoordelikheid en werklike handeling van die mens self. Tussen hierdie twee kante van geloof is daar ten diepste geen teenstrydigheid nie (Joh.5:39; 14:6; Hand.4:12; Rom.5:12-19; 1:2-4, 16-17; 11:33-36; Ef.2:8-9; 3:1-14; Openb.5:9-10; 7:10; Rom.4:16, 23-25; Ps.110:3; Joh.6:37, 44; Hand.13:48; 16:14).

7. Ons glo in Jesus Christus se persoonlike, liggaamlike en historiese opstanding uit die dood; in Sy hemelvaart; en in Sy huidige heerskappy ter wille van Sy mense en om alles aan Hom te onderwerp (Hand.1:3; 2:33; 13:38-39; 1Kor.15:3-6; Gal.3:16-22; Ef.1:10; Kol.1:20).

8. Ons glo in die persoonlike wederkoms van Jesus Christus (Hand.10:42; Rom.14:9-10; 1:11; 2Pet.2:4).

9. Ons glo dat Jesus Christus deur die werk van die Heilige Gees vir Hom ewige volk uit die ganse mensdom versamel, ongeag ras, geslag of stand. Elkeen wat hieraan deel het, toon die egtheid daarvan deur volhardende gehoorsaamheid aan Hom (Joh.17:2-5; 2Kor.5:18-19; 1Pet.1:3-4; Joh.1:12-13; 1Kor.2:6-16; 1Joh.5:1).

10. Ons glo in die Heilige Gees. Hy het op die Pinksterdag as Parakleet (Trooster / Voorspraak / Helper) vanaf die Vader en die Seun na die Nuwe Testamentiese gemeente gekom. Sedertdien woon Hy in alle ware gelowiges om die Seun se Middelaarswerk en regering in hulle te verwerklik. Sodoende verheerlik Hy Jesus Christus in en deur gelowiges en is Hy die waarborg dat hulle hul volle erfenis as God se kinders uiteindelik sal ontvang. Hy lei elkeen van hulle, sonder opheffing van hul verantwoordelikheid of gehoorsaamheidsvolharding, na die finale afronding van hul verlossing d.m.v. die Woord en die genademiddele wat daarmee saamhang. Sonder Sy wederbarende verligtende, versekerende, heiligmakende en toerustende werk is ware Christenskap en kerkwees totaal onmoontlik (Hand.2:39; Rom.8:9, 14, 17, 23, 26; Luk.11:13; Ef.1:13-14; 4:30; 5:18-21; 1Kor.12:4-11; 12-13; 2Kor.3:18; Kol.3:10; Joh.14:16-18, 26; Gal.5:16-26; 1Tes.5:19).

11. Ons glo in die liggaamlike opstanding uit die dood van alle mense – diegene wat in Christus gesterf het om deel te hê aan die ewige saligheid en die res om deel te hê aan die ewige verdoemenis (Rom.1:4; 4:25; 6:5; 1Pet.1:3; 1Kor.15:12-21, 20-21; Matt.27:53; Hand.1:21; 2:31; 3:21).

12. Ons glo dat Jesus Christus alle ware gelowiges (en net hulle) beveel om Hom van plek tot plek gesamentlik in gemeenteverband te dien volgens die riglyne wat Hy daarvoor in die Skrif neerlê, Elke gelowige is dus verantwoordelik om hom, indien enigsins moontlik, by ’n gemeente te voeg waar die Here in gees en waarheid gedien word; om hom aan die broers en susters toe te wy; en om hom aan die gepaardgaande dissipline te onderwerp. So ’n plaaslike gemeente staan slegs onder die gesag van Jesus Christus, maar benodig tog vir sy welsyn gemeenskap met ander gemeentes waar die Here ook in gees en waarheid gedien word (Hand.2:42-47; 20:7; Ps.119:148; Matt.6:6; 18:15-20; 1Kor.12:12-27; Ps.84; Hebr.10:25; Rom.1:7; Ef.1:20-22).

13. Ons glo dat Jesus Christus die Doop en die Nagmaal ingestel het en dat dit deur alle ware gelowiges (en net hulle) in gehoorsaamheid en as belydenis onderhou moet word as heenwysing na die mees basiese aspekte van hulle geloof en verlossing. Die Doop is die onderdompeling van die gelowige in water as belydenis van sy identifisering met Jesus Christus in Sy dood, begrafnis en opstanding. Die Nagmaal is die deelname aan die brood en die beker wat wys op Jesus Christus se versoeningsoffer, naamlik Sy gebroke liggaam en gestorte bloed (Hand.2:37-41; 8:12-13, 36-38; 9:18; 10:47-48; 11:16; 15:9; 16:14-15, 31-34; 18:8; 19:3-5; 22:16; 1Pet.3:21; Rom.6:3-4; Gal.3:27; Kol.2:12; 1Pet.3:21; Hebr.9:25, 26, 28; 10:22; Matt.7:6; 15:9; 26:26-28; 28:19-20; Joh.3:23; 6:29, 35,47-58; 1Kor.10:1-2, 16, 17, 21; 11:23-29; 2Kor.6:14-15; Eks.20:4-5; ).

OPE BRIEF AAN DIE N.G. KERK

(Meer as 3000 kopiee van hierdie brief is uitgestuur na alle beskikbare E-Posadresse in die N.G. Kerk)

2012-05-04

Geagte Broeder

Na baie gebed en besinning rig ek hierdie brief aan u en ’n klompie ander broeders in die N.G. Kerk en vra dat u hierdie brief biddend sal lees en met ’n oop gemoed daarna sal kyk.

Ek is tans ’n predikant in die Vaaldriehoek Gereformeerde Baptistegemeente en het teologie studeer aan die Potchefstroomse Universiteit vir C.H.O. Voor ek voltyds in die bediening betrokke geraak het, was ek baie lank ’n onderwyser waarvan 12 jaar as skoolhoof. Ek en my vrou was ook baie jare lidmaat van die N.G. Kerk, maar is in 1984, toe die N.G. Kerk nog gestaan het op hul belydenisskrifte, onder sensuur geplaas en afgesny van ’n N.G.-gemeente in Ermelo omdat ons, nadat ons waarlik tot wedergeboorte gekom het, oortuig geraak het van die doop van gelowiges (die kredodoop) en ons laat doop het. Ons het deur die jare heen hegte vriendskapsbande met N.G.-lidmate gehad (en het nog steeds) – lidmate wat waarlik die Here Jesus Christus as Saligmaker navolg (beide "kredo- en paedodopers").

Ek glo met 'n gebroke hart dat 'n skokkende groot deel van die institusionele kerk van ons dag grootliks koers verloor het, in sekere gevalle selfs reddende geloof versaak het, en dringend nodig het om onverwyld en met hartstog terug te keer na die fundamentele geloofsvertrekpunte van die Reformasie: die Skrif alleen, genade alleen, Christus alleen, geloof alleen, die eer van God alleen. Ek onderskryf die histories-gerespekteerde en internasionaal-erkende 1689 Baptiste Belydenis - soos meeste reformatoriese (gereformeerde) Baptiste oor die wêreld heen, asook die Belydenisskrif en Kernwaardes van Sola 5, 'n assosiasie van Godgesentreerde evangeliese gemeentes en gelowiges in (tans) agt lande in Suider-Afrika

Waarom rig ek hierdie brief aan u? Die afgelope jaar of drie, maar veral die afgelope jaar het ek intens bewus geraak van ernstige dwaalleer wat posgevat het in die N.G. Kerk en ek is intens besorg oor broers en susters in die Here Jesus Christus wat in die N.G. Kerk is. Ek kry van tyd tot tyd te doen met predikante in u denominasie en ek ervaar intense bekommernis en selfs verwarring by van hulle (veral jongeres).

Ek het ook bevriend geraak met heelwat N.G.-lidmate en ’n paar predikante op "Facebook" en kon ek sommige van die debatte wat gevoer word tussen regsinnige lidmate en –predikante aan die eenkant en "nuwe hervormers"/"verligtes"/"liberales"/"vrydenkers" aan die anderkant. My simpatie met die "behoudendes" aan die eenkant en my skok en ontnugtering in predikante wat in my oë bykans niks meer van die Woord van God glo nie, het a.g.v. hierdie debatte, net nog verder verdiep.

Wat ek nie kan verstaan nie, is dat die N.G. Kerk oënskynlik die wil en vermoë verloor het om op te tree teen teoloë, ampsdraers en predikante wat nie meer volgens die Belydenisskrifte en die Woord van God optree nie en derhalwe in my oë dwaalleraars geword het (Openb.2:14-15; 1 Tes.5:14; 2 Tim.4:2-5; Deut.13:5; 1 Kor.5:11, 13; Titus 1:9; e.a.). In die lig van Ferdie Mulder se boek, asook dit wat ek in die pers, persoonlike Blogs en "Facebook" lees, kan ek nie anders as om te dink dat die gesagstrukture van die N.G. Kerk reeds deur die "nuwe hervormers" gekaap is en daarom dat niks gedoen word aan persone/lidmate wat die Kerk van die Here Jesus Christus intens skade berokken nie.

Ek kan bv. nie verstaan hoe ’n persoon soos Jean Oosthuizen steeds maar net toegelaat word in sy posisie by die Kerkbode, terwyl hy blatant voortgaan om mense (insluitende myself) te belaster, te beledig, te verkleineer en geen standpunt inneem teen dwaalleer nie – hy maak ’n openlike bespotting van God Drie-Enig, ens. (Titus 1:16; e.a.). Hy gebruik baie dikwels kru taal teenoor mense wat opgevoede heidene nie eens sal gebruik nie (’n voorbeeld van een van die "Facebook" drade wat hierdie feite bevestig kan op versoek verskaf word) en dan praat ek nie eens van sy persoonlike "Facebook-muur" nie! Christene wat sterk van hom op Facebook verskil, word summier geblok, maar ateïste word ‘n vry hand gegee om God te laster. Dit lyk na ‘n eensydige skending van spraakvryheid.

Ek staan verstom en geskok oor sommige predikante se uitsprake oor die hel (wat kwansuis nie bestaan nie – Matt.5:22; Mark.9:47-48; 1 Tim.1:19-20; e.a.); die feit dat Satan nie ’n werklikheid is nie (Jak.4:7; 1 Pet.5:8; e.a.); geen sondeval nie (Gen.3; 1 Joh.1:6, 8; e.a.); dat Jesus nie uit ’n maagd gebore is nie (Matt.1:18; Luk.1:34; e.a.); die feit dat Christus nie uit die dood opgestaan het nie (Luk.24:36; Joh.20:27; e.a.); dat Jesus Christus nie aan die regterhand van God die Vader sit nie (Mark.16:19; e.a.); die skepping; Jona en Noag wat mitologiese verhale is; uitsprake wat positief is oor die "emergent church", panenteïsme, homoseksualitiet, ens. ens. My vraag is, hoe die N.G. Kerk steeds kan toelaat dat die gewone lidmaat (geredde en soekendes) wat op soek is na ’n ware en intieme verhouding met Jesus Christus en groei in heiligmaking, blootgestel kan word aan sulke predikante en selfs ’n moderator? Manne soos Nelus Niemandt; ’n Albert Cruywagen; Gerhard Bothma; Ben du Toit en talle teologiese professore en andere? Ek wil nie eers kommentaar lewer op sommige sinodale besluite nie.

Ek wil nie eers kommentaar lewer op sommige werklik-ontstellende Algemene Sinode- besluite nie.

Aan die begin van hierdie jaar, toe ek ook Ferdie Mulder se boek "Opgestaan" gelees het, is dit wat ek ervaar, gehoor, gelees en vermoed het, opnuut bevestig en het ek net nog meer intens bewus geraak van wat in die N.G.K. aan die gang is en wat sommige van u as predikante, studente en talle lidmate moet ervaar. My hart het al meer begin pyn vir regsinnige (gereformeerde) broers en susters in die N.G. Kerk en het ek net nog dieper bewus geraak van die nood; die paniek; die verwarring; die pyn; ens. wat besig is om pos te vat by diesulkes. Ek is veral ook intens bekommerd oor "onskuldige" kinders wat "losgelaat" word in van die teologiese fakulteite waar N.G. predikante opgelei word.

Ek en ons gemeente is tans deel van "SOLA 5", ’n assosiasie van Evangeliese Christene in Suidelike Afrika en ek dien ook tans op die hoofbestuur van "SOLA 5". Die meeste van die predikante wat deel uitmaak van "SOLA 5" is Engelssprekende broers in die Here en hulle wil gedurig van my weet wat aan die gang is in Afrikaanse kerklike geledere en hoe ek dit sien. Ek self vra my daagliks die vraag af: Wat gaan hier aan? Wat kan ons doen – wat kan ek doen? Dit gaan tog immers hier oor die eer van God en die waarheid!

Die Skrif roep ons ernstig op om te waak teen dwaalleer, omdat dit mense weglei van die geopenbaarde waarhede. Dit is nie ‘n saak wat enige Christen by hom kan laat verbygaan nie (2 Pet.2:1-2; Titus 1:7-11; 2 Tes.2:15; e.a.).

My broeder in Christus, ek is intens bekommerd oor die Kerk in Suid-Afrika in die algemeen en dan spesifiek oor wat aan die gang is in die N.G. Kerk en ek bid dat die Here sal ingryp en Sy eer sal herstel. Ek wens so dat ek hande kon vat met u in hierdie stryd op vergaderings, forums, sinodes, ens., maar omdat ek nie lidmaat van die NGK is nie, kan ek nie en kan ek u maar net verseker van my voorbidding en dat ek waar moontlik my bydrae sal lewer.

Sterkte in die stryd – ek dink aan u!

U broeder in Christus Jesus.

Kobus van der Walt