.: April 2015

Tuesday, April 28, 2015

Die Profeet Sagaria - 11 (“Die Here Voorsien”)

1. INLEIDING:

In die vorige gedeelte waarna ons in Sagaria gekyk het (9:1-17) het ons te doen gekry met ’n inleiding tot die tweede deel van Sagaria se boodskap wat handel oor die toekoms van God se volk - van ’n volk wat terugkeer uit ballingsakp na ’n volk wat vol verwagting is vir die koms van die Lydende Messiaanse Koning - Hy wat nie net die volk Israel met Hom sal verenig nie, maar ook Sy finale Koninkryk sal vestig - dán sal Christus erken word as die Koning, nie net in Jerusalem deur Sy volk nie, maar ook deur die nasies - die sentrale boodskap dus van die Nuwe Testament.

2. SKRIFLESING:

Sag.10:1-12 ~ 1) Vra vir die Here reën in die tyd wanneer die laat reëns moet kom. Hy maak die reënwolke en laat die stortreëns val, Hy gee vir die mense die groen plante in die veld. 2) Wat die afgodsbeelde sê, is bedrog; wat die waarsêers sien, is leuens; die drome wat hulle vertel, het nie plaasgevind nie; hulle probeer troos met wat nie bestaan nie. Daarom moes die volk weg, moes hulle in ellende beland soos skape wat nie 'n wagter het nie. 3) Maar nou het my toorn ontvlam teen die herders, Ek gaan rekenskap eis van die voorbokke, sê die Here. Ja, die Here die Almagtige het Hom die lot van sy kudde Juda aangetrek, Hy gaan hulle sy trotse oorlogsperd maak. 4) Uit Juda sal die hoekklip kom, uit hom sal die tentpen, uit hom die pyl en boog vir die oorlog kom, en uit hom sal elke onderdrukker padgee. 5) Soos sterk vegsmanne sal die mense van Juda die vyand soos modder in die strate vertrap. Hulle sal veg, want die Here is by hulle; hulle sal die perderuiters op die vlug jaag. 6) Ek sal Juda sterk maak, Ek sal Josef red. Ek laat hulle terugkom, want Ek is jammer vir hulle. Dit sal wees asof Ek hulle nie verwerp het nie. Ek is die Here hulle God en Ek het hulle gebede verhoor. 7) Die mense van Efraim sal soos sterk vegsmanne wees, hulle sal vrolik wees asof hulle wyn gedrink het. Hulle kinders sal dit sien en bly wees, hulle sal juig oor My, die Here. 8) Ek sal vir hulle fluit en hulle bymekaarmaak. Ja, Ek gaan hulle red, en hulle sal net so baie wees as tevore. 9) Al verstrooi Ek hulle weer onder die volke, sal hulle My daar in die ver plekke onthou, en hulle en hulle kinders sal bly lewe en terugkom. 10) Ek sal hulle laat terugkom uit Egipte, Ek sal hulle uit Assirië uit bymekaarmaak en hulle na Gilead en die Libanon toe bring, en dié sal nie genoeg plek vir hulle hê nie. 11) Die volk sal deur die gevaarlike see trek, die golwe in die see sal oorwin word en al die Nyldieptes sal opdroog. Die hoogmoed van Assirië sal tot' n val kom, die heerskappy van Egipte sal die wyk moet neem. 12) Ek, die Here, sal by my volk wees en hulle sterk maak. Hulle sal in my Naam voortgaan. Die Here het dit gesê.

Ons gaan in hierdie gedeelte vandag kyk na die Here se voorsiening t.o.v. Sy volk…

• …se fisiese behoeftes (vv.1-2);

• …se suiwering (vv.3-5);

• …se bemagtiging (vv.6-12).

3. DIE VOLK SE FISIESE BEHOEFTES (vv.1-2):

Die volk het pas uit ballingskap terug gekeer en die land lê braak en onbewerk. Ten einde die landbou weer aan die gang te kry, het hulle reën nodig en daarom roep Sagaria die volk op om te bid vir reën - reën op die regte tyd en hy herinner hulle daaraan dat slegs God instaat is om reën op die regte tyd te verksaf, omdat Hy die Almagtige Skepper van wolke en reën is en hy beklemtoon hierdie feit, omdat die volk vantevore hulle tot afgode gewend het in tye van o.a. droogte - dit in teenstelling met God se belofte in Deut.11:13-14 ~ As julle al die gebooie wat ek julle vandag gee, stiptelik gehoorsaam en die Here julle God liefhet en dien met hart en siel, sal Hy vir julle land sy reën gee op die regte tyd, lente- en somerreëns, en julle sal koring, wyn en olie oes.

Sagaria gaan dan verder en sê in geen onduidelike taal, waarom die afgode nie kan help nie, want sê hy, dit is nie die waarheid nie - dit is bedrog; wat die afgodedienaars sê wat gaan gebeur, gebeur nooit nie; die waarsêers is vol leuens en drome wat gedroom word, realiseer nooit nie, wat meer is, hulle is ook nie instaat om die volk te vertroos nie en omdat die volk in die verlede hulle tot hierdie nuttelose gode gewend het, is hul gestraf en weggevoer in ballingskap - daarom is dit tyd dat die volk terugkeer na die Here en Hom vra om uitkoms te gee en Sy reën te laat val op die regte tyd, want net Hy en Hy alleen kan dit laat gebeur, omdat Hy die Skepper God is - Skepper van die wolke en die reën.

4. DIE VOLK SE SUIWERING (vv.3-5):

Vers 3 begin met die woorde, “…maar nou…” Met hierdie uitdrukking wil Sagaria sê, dat as gevolg van die afvalligheid en sonde van die volk - die feit dat die volk hulle gewend het tot afgode en derhalwe hul rug gedraai het op God, gaan Hy nou die situasie verander. In die lig van die afwesigheid van ware herders in Israel, gaan die Here ’n reinigingsproses van stapel stuur en gaan hy alle vals- en dwaalleraars verwyder en rekenskap eis van die voorbokke - letterlik, die leiers - hulle wat die voortou geneem het in die vals leer wat versprei is en wat die volk aangemoedig het om vals gode te raadpleeg vir reën en ander behoeftes. Let op: hierdie woord “herders” verwys nie net na die geestelike leiers nie, maar ook na die politieke leiers - almal in gesagsposiesies.

God se voorneme in Eseg.34 om die geestelike en politieke leiers onder die volk te straf oor die pastorale verwaarlosing en dwaalleer, gaan nou ’n realiteit word hier in Sagaria 10 - hoor wat het Esegiël geprofeteer ~ My kleinvee het rondgedwaal oor al die berge en oor al die hoë heuwels, hulle het verstrooi geraak oor die hele aarde en niemand het hulle gesoek of na hulle gevra nie. " Daarom, herders, hoor die woord van die Here:" My kleinvee is uitgelewer en het die prooi van enige wilde dier geword; hulle is sonder herder, sonder iemand wat na hulle soek; die herders het vir hulleself gesorg en nie vir my kleinvee nie. So seker as Ek leef, "sê die Here my God," Ek sal die herders straf (Eseg.34:6-8).

Die Here gaan egter nie net die volk se leiers straf vir hul dwaaleer nie, maar Hy gaan ook voosien in die volk se geestelike behoeftes - daarom dat Hy in v.3b sê ~ Ja, die Here die Almagtige het Hom die lot van sy kudde Juda aangetrek, Hy gaan hulle sy trotse oorlogsperd maak. Hierdie is ook ’n vervulling van die belofte wat in Eseg.34:9-11 (en verder) gegee is ~ Hoor die woord van die Here, herders! So sê die Here my God:"Ek gaan optree teen die herders:Ek eis my kleinvee van hulle terug, Ek maak 'n end daaraan dat hulle die kleinvee se herders is, hulle sal nie herders bly net om vir hulleself te sorg nie. Ek sal my kleinvee red en hulle nie deur die herders laat opeet nie." So sê die Here my God:"Ek sal self my kleinvee soek en na hulle omsien.

Uiteindelik sal God afreken met alle heidense leiers en Sy volk geestelik restoureer en een ware Leier aan hulle gee en hierdie Leier sal oor drie leierskapseienskappe beskik:

• ’n Hoekklip: Daar is maar net een ware leier, nl. “die Hoekklip

wat uit Juda kom” - Jesus Christus (v.4). Met hierdie uitdrukking en verwysing na die Hoekklip, het ons te doen met waarskynlik die mees belangrike Messiaanse beeld in die ganse Bybel. DIe oorspronklike idee van hierdie beeld kan terug gevoer word na Jes.28:16 ~ So sê die Here my God: Ek gaan in Sion 'n klip neersit,' n uitgesoekte klip, 'n hoekklip wat fondament aan fondament sal sluit. Wie op My vertrou, hoef nie te vlug nie. Ook Ps.118:22-23 ~ Die klip wat deur die bouers afgekeur is, juis hy het die belangrikste klip in die gebou geword. Dit is deur die Here gedoen en is 'n wonder in ons oë. Jesus het ook na Homself verwys as die Klip, toe Hy hierdie selfde Ps.118 in Matt.21:42 aangehaal het.

In Hand.4:11-12 het Petrus ook verwys na Jesus as die steen, toe hy gesê het ~ Hy is die klip wat deur julle, die bouers, afgekeur is. Juis Hy het die belangrikste klip in die gebou geword. Hy bring die verlossing en niemand anders nie. Daar is geen ander naam op die aarde aan die mense gegee waardeur God wil dat ons verlos moet word nie.

Petrus gaan nou in 1 Pet.2:4-5 voort en sê ~ Kom na Hom toe, die lewende steen, wat deur die mense afgekeur is, maar deur God vir die ereplek uitverkies is. Laat julle as lewende stene opbou tot 'n geestelike huis, om' n heilige priesterdom te wees en geestelike offers te bring wat deur Jesus Christus vir God welgevallig is.

In Ef.2:19-22 sê Paulus ~ Julle is dus nie meer ver van God af nie, nie bywoners nie, maar medeburgers van die gelowiges en lede van die huisgesin van God. Julle is 'n gebou wat opgerig is op die fondament van die apostels en die profete,' n gebou waarvan Christus Jesus self die hoeksteen is. In Hom sluit die hele gebou saam en verrys dit tot 'n heilige tempel vir die Here, in wie julle ook saam opgebou word as' n geestelike huis waarin God woon.

Sagaria sê dus vir die volk dat God hulle geestelik sal herstel en stabilitiet en sekuriteit sal gee en dít sal Hy doen deur die Messias (Jesus Christus) wat Hom en die volk sal saamsnoer, net soos wat ’n hoeksteen in ’n gebou, die mure saamvoeg en stabiltiet daaraan verleen. Die vorige herders het die volk weggelei van die Here af; die volk kon nie op hulle staamaak nie, maar die “Hoeksteen” wat God gaan stuur, sal ’n vaste vesting vir hulle wees.

• ’n Tentpen: Daar word ook melding gemaak van ’n tentpen in

v.4. Daar was destyds twee soorte penne waarna hierdie tentpen verwys het. Eerstes was daar die pen wat die tent m.b.v. ’n spantou aan die buitekant geanker het teen stormwinde (spesifiek in Bedoïne tente). Dit was hierdie selfde tipe pen waarmee Jael die vrou van Geber, Sisera vermoor het toe sy die pen deur sy slaap geslaan het (Rigters 4:21-22).

Daar was egter ook ’n pen wat aan die binnekant van ’n tent of huis gebruik was, waaraan mense hul gereedskap, eetgerei of ander kosbare besittings gehang het (Eseg.15:3). Hier het Sagaria dalk Jes.22 in gedagte gehad toe die Here vir Jesaja gesê het om na die bose hoë amptenaar Sebna te gaan en vir hom te sê dat hy vervang gaan word met Eljakim en dan gaan Hy voort in v.23 en sê ~ …Ek sal hom in sy amp bevestig, hy sal wees soos 'n spyker wat goed ingeslaan is, in sy amp sal hy die trots van sy hele familie word.

Watter pen Sagaria hier in gedagte het is nie duidelik nie en dit maak ook nie regtig saak nie, want in beide gevalle verwys die pen enersyds na God se oordeel en vernietiging en net so sê Sagaria, gaan Jesus Christus al die bose leiers straf en vernietig, asook die boosheid wat hul omring het en Sy kinders sal in totaliteit herstel word. DIe Messias is andersyds, Almagtige God in wie die volk kan skuil; op wie hulle kan vertrou, omdat Hy onwankelbaar is - …’n pen wat in ’n vaste plek ingeslaan is (OAV).

• ’n Pyl en Boog: Die pyl en boog in v.4 verwys ook na die “Groot Vernietiger”, die Messias Jesus Christus, wat die bose uiteindelik finaal gaan oorwin ~ Ek het gesien: daar was 'n wit perd. Sy ruiter het' n pyl en boog gehad. 'n Oorwinnaarskroon is aan hom gegee, en hy het as oorwinnaar uitgegaan om nog verder te oorwin (Openb.6:2).

Uit hierdie gedeelte is dit dus duidelik dat die Here omgee vir Sy kinders - Hy ís in hulle midde en Hy suiwer hulle van bose leiers en herstel hulle geestelik en uiteindelik sal hulle ook oorwinning in en deur Hom ervaar - Hy die Ware en volmaakte Leier - Hy wie die volmaakte Hoekklip is; die onwankelbare Tentpen wat in ’n vasteplek ingeslaan is; die magtige Pyl-en-Boog.

5. DIE VOLK SE BEMAGTIGING (vv.6-12):

Die tema van ons laaste paar verse (vv.6-12) handel oor die volk se bemagtiging - God gaan hulle versterk en Hy gaan dit doen deur die twee koninkryke te herenig.

Met die dood van Salomo in 931 v.C. het 9 Israeliese stamme hulle in die noorde gevestig en het bekend gestaan as Samaria, terwyl die stamme van Juda en Benjamin in die suide hulle gevestig het as Juda (die stam van Simeon het in die verre suide gebly).

Die grootste en invloedrykste Noorder-stamme was dié van Manasse en Efraim en hulle was beide afstammelinge van Josef. Die Here sê nou in v.6 dat Hy Juda wat terugkeer uit ballingskap, na hul straf op hul sonde, weer sterk gaan maak deur Josef terug te bring en saam te voeg met Juda - bedoelende dat die Here die noordelike stamme weer sal herenig met die suidelike stamme - ‘n belofte wat reeds in Eseg.37:15-28 gemaak is ~ So sê die Here my God: Ek vat die Josefhout wat staan vir Efraim en die Israelitiese stamme wat sy bondgenote is, en Ek sit dit teen die Judahout en Ek maak van die twee een stuk hout, sodat hulle in my hand een stuk is (v.19). Juda se redding lê dus opgesluit in die stam van Josef.

God vergeet nie Sy kinders nie en Hy belowe om hulle genadig te wees, daarom dat Hy in v.6 sê ~ …Ek laat hulle terugkom, want Ek is jammer vir hulle. Dit sal wees asof Ek hulle nie verwerp het nie. Die Amplified Bible stel dit baie mooi ~ I will bring them back and cause them to dwell securely, for I have mercy, loving- kindness, and compassion for them. Dit is hoe die Here voel oor hulle wie aan Hom behoort - vol genade en liefde en besorgdheid.

Verse 8-12 verskaf aan ons meer detail oor hoe die Here hulle gaan herstel en bemagtig en dit begin met ’n pragtige beeld, nl. ~ Ek sal vir hulle fluit. Skaapherders het gewoonlik hulle veë gelei en geroep deur ’n deuntjie te fluit, of om op ’n fluit te speel en Sagaria wil met hierdie beeld sê dat die Here, die Groot Herder besig is om Sy kudde bymekaar te maak soos ’n skaapherder sy skape - Hy roep hulle byeen vanuit al die windstreke en al die skape wat sy stem ken, reageer positeif ip sy fluit-geroep.

Dit is dus duidelik dat die Here Sy verbondskinders nie alleen onthou nie, maar húlle sal ook Sy stem herken wanneer Hy hulle roep.

In v.10 verwys die profeet na ander nasies (Egipte en Assirië wat al die nasies verteenwoordig) en sê dat die Here Sy kinders uit al die nasies waarheen hulle weggevoer is, sal terugbring en hulle sal soveel wees dat daar nie eers plek vir hulle sal wees in die grondgebied van Gilead en die Libanon nie.

Die opmerking in v.11 dat die volk deur die gevaarlike see sal trek en dat die golwe oorwin sal word en die Nyldieptes sal opdroog, verwys na die Israeliete se uittog uit Egipte en hul tog deur die Rooi See. Wat wil Sagaria hierdeur sê? Dat die Almagtige God wat die uittog uit Egipte kon orkestreer en wel op so ’n wyse dat selfs die natuur Hom nie kon stuit nie, dat Hy met dieselfde “kragtige hand” die heidennasies sal oorwin en hulle sal hul heerskappy verloor en daar sal dus niks in die pad staan van God om Sy kinders byeen te bring en vir Sy kinders om na Hom te kom nie.

Geen nasie en geen natuurkrag sal dus oorweldigend genoeg wees om God daarvan te weerhou om Sy kinders bymekaar te maak en te herstel nie, daarom dat Sagaria in v.12 afsluit met die woorde ~ Ek, die Here, sal by my volk wees en hulle sterk maak. Hulle sal in my Naam voortgaan. Die Here het dit gesê.

6. AFSLUITING:

In hierdie profesie van Sagaria het ons te doen met kosbare beloftes aan God se kinders, wat Hy deur die Israeliete in Sagaria se tyd maak, maar ook wanneer ons die lyn deurtrek na die Kerk van ons Here Jesus, want net soos wat die Here Sy volk destyds byeen gebring het, net so bring Hy vandag nog al Sy uitverkorenes bymekaar, ongeag die moeilikhede en aanslae van hierdie wêreld - net soos wat Hy Sy volk uit Egipte en uit ballingsakp gebring en verenig het, net so bring Hy ons uit die duisternis en verenig Hy ons in Sy kerk,

Dit blyk baie duidelik uit hierdie gedeelte waarna ons vanoggend gekyk het, dat Sagaria homself nie net blindstaar teen die feit dat God sy volksgenote met mekaar, maar ook met God gaan verenig nie, maar hy versit ook die horison van sy verwagting van die Lydende Messiaanse Koning wat sal kom, want dán sal God erken word as dié Koning, nie net in Jerusalem deur sy volk nie, maar ook deur die nasies, ‘n boodskap wat ook in die Nuwe Testament weerklank vind.

Net soos wat die Here Sy volk se lot vernader het, net so gaan Hy ons lot ook verander wanneer ons, ons tot Hom wend.

Ons is as gelowiges saamgesnoer in Jesus Christus. Hy wat ’n vaste vesting vir ons is - net soos ’n tent in stormwind stewig geanker is, net so kan ons in Christus rus en ons vertroue in Hom stel. In Hom is ons stewig geanker teen die aanslae van die bose en die vlees - die voorwaarde is net dat ons met alles aan Hom moet hang soos die volk van die Here destyds hul kosbaarhede aan die pen in die huis gehang het.

Ons “Pyl-en-boog, die “Groot Vernietiger”, Jesus Christus sal uiteindelik ook ons vyand, die satan, asook die sonde, finaal vernietig en ons volkome, geestelik suiwer en sal ons die finale oorwinning in Hom ervaar.

Hy is voorwaar ons genadige en liefdevolle Vader en ons dank Hom dat Hy, Sy “fluit” ook tot ons gerig het en dat Hy ons instaat gestel het om daardie unieke uitverkiesende “fluit” te kon hoor, daarom eer ons Sy heilige Naam.

(Boodskap gelewer deur Kobus van der Walt te Vaaldriehoek Gereformeerde Baptistegemeente op 26 April 2015)

Subscribe to: Posts (Atom)

Ons Geloofshoekpenne

1. SOLI DEO GLORIA - DIE EER VAN GOD ALLEEN Alles wat God beplan het en in die geskiedenis uitvoer (niks wat is of gebeur, is uitgeslote nie), het een finale doelwit, nl. om Homself te verheerlik. Die najaging van hierdie doel is dan ook elke mens se hoogste en onontkombare roeping. Om vir jouself te leef, is die wese van sonde

2. SOLUS CHRISTUS - CHRISTUS ALEEN Hierdie genade wat God aan miljoene sondaars deur alle eeue betoon het, was nog altyd volledig gebaseer op die volmaakte middelaarswerk van Sy Seun, Jesus Christus, en daarop alleen.

3. SOLA SCRIPTURA - DIE HELE SKRIF EN NET DIE SKRIF Die hele Bybel, en net die Bybel, is God se besondere en geïnspireerde openbaring aan die mens. Daarom is dit algeheel betroubaar en die universeel gesagvolle norm vir leer en lewe.

4. SOLA GRATIA - GENADE ALLEEN As 'n sondaar gered word, dan is dit geheel-en-al te danke aan God se vrye genade, en daaraan alleen.

5. SOLA FIDE - GELOOF ALLEEN God verklaar enige en elke sondaar regverdig wanneer die vanuit sy of haar geestelike en morele bankrotskap volledig op die middelaarskap van Jesus Christus staat maak ten einde vir God aanvaarbaar te wees. Daar is geen ander manier om met God versoen te word nie. Geen menslike verdienste, van watter aard ook al, kan Christus se verdienste aanvul nie; trouens, die Woord waarsku uitdruklik dat enige poging daartoe diskwalifiserend is.

Wat Glo ons?

DIE WAARHEID MAAK VRY!

Watter waarheid maak vry?
1. Daar is maar net een waarheid en dit is die waarheid soos opgeteken in die onfeilbare Woord van die Drie-Enige God (“Die hele Skrif is deur God geïnspireer en het groot waarde om in die waarheid te onderrig, dwaling te bestry, verkeerdhede reg te stel en ŉ regte lewenswyse te kweek” - 2 Tim 3:16).

2. Ons glo voorts dat die geskrifte van die Ou- en Nuwe Testament, God se besondere openbaring aan die mens is; dat dit, soos oorspronklik neergeskryf, ten volle deur God geïnspireer is; dat hierdie openbaring (die kanon) afgesluit en genoegsaam is; dat dit volkome betroubaar is m.b.t. leer en inhoud; en dat dit die hoogste en finale gesag is vir geloof en lewe (2Tim.3:15-17; Jes.8:20; Luk.16:29-31; Ef.2:20; Rom.1:19-21; Rom.2:14-15; Ps.19:1-3; Hebr.1:1; Spr.22:19-21; Rom.15:4; 2Pet.1:19-20).

3. Ons glo in die enigste en ewige Drie-enige God: Vader, Seun en Heilige Gees – soos Hy Homself in al Sy verhewe heerlikheid in die Heilige Skrif aan ons openbaar (Deut.6:4; Jer.10:10; 1Kor.8:4-6; 1Tes.1:9; Matt.28:19; 2Kor.13:14).

4. Ons glo dat God alle dinge geskape het, met die mens as kroon en rentmeester van Sy skepping. Die eerste mens, Adam, het in sonde geval en so sy oorspronklike geregtigheid verloor. So het hy homself en die hele skepping in ellende gedompel. Dit geld besonderlik sy nageslag (die ganse mensheid), wat sedertdien in verlore toestand onder God se toorn verkeer. Gevolglik het alle mense, reeds vanaf ontvangenis en geboorte, deel aan die erfsonde, wat enersyds die erfskuld (juridies skuldige toestand onder die oordeel van God) en andersyds die erfsmet (moreel verdorwe toestand van sondegeneigdheid) behels. Die gevalle mens is dus geestelik dood en sonder die lewendmakende herskeppingswerk van die Heilige Gees is dit totaal buite sy vermoë om die Evangelie te verstaan, in Christus te vertrou, van sonde te bekeer, God lief te hê en Hom te gehoorsaam (Gen.1:31; Kol.1:16; Rom.3:23; 5:12; Titus 1:15; Gen.6:5; Jer.17:9; Rom.3:10-19; 5:12-19; 1Kor.15:21, 22, 45, 49; Ps.51:7; Job 14:4; Ef.2:3; Rom.6:20; 5:12; Hebr.2:14-15; 1Tes.1:10).

5. Ons glo in Jesus Christus, God se Seun, wat ontvang is van die Heilige Gees en uit die maagd Maria gebore is as volkome God en volkome mens vir ewig. Hy het as God se Groot Profeet, Priester en Koning na hierdie wêreld gekom. Hy is Hoof van die uitverkore mensheid en God se hoogste en finale openbaring aan die mens (Matt.1:22-23; Luk.1:27, 31, 35; Rom.1:3-4; Fil.2:6-11; Kol.2:9).

6. Ons glo in Jesus Christus as enigste Middelaar tussen God en sondaars. Hy is gekruisig en het gesterf ten einde hulle van die heerskappy en gevolge van hul sonde te verlos. Hy het in volmaakte gehoorsaamheid onder die Wet gelewe sodat Sy geregtigheid aan hulle toegereken kan word. Hulle kry nie deel aan hierdie dubbele verlossingsgenade van God op grond van enige eie verdienste nie, maar dit word aan hulle toegereken deur geloof alleen. Hierdie geloof is nie bloot regsinnige opinie nie, maar is, vanuit diep bewussyn van eie onwaardigheid, lewenslange en uitsluitende vertroue in Jesus Christus wat as Versoeningsoffer die Vader se heilige geregtigheid volkome bevredig het. Geloof is enersyds soewereine gawe van God, gewerk deur Sy Gees; dit is andersyds verantwoordelikheid en werklike handeling van die mens self. Tussen hierdie twee kante van geloof is daar ten diepste geen teenstrydigheid nie (Joh.5:39; 14:6; Hand.4:12; Rom.5:12-19; 1:2-4, 16-17; 11:33-36; Ef.2:8-9; 3:1-14; Openb.5:9-10; 7:10; Rom.4:16, 23-25; Ps.110:3; Joh.6:37, 44; Hand.13:48; 16:14).

7. Ons glo in Jesus Christus se persoonlike, liggaamlike en historiese opstanding uit die dood; in Sy hemelvaart; en in Sy huidige heerskappy ter wille van Sy mense en om alles aan Hom te onderwerp (Hand.1:3; 2:33; 13:38-39; 1Kor.15:3-6; Gal.3:16-22; Ef.1:10; Kol.1:20).

8. Ons glo in die persoonlike wederkoms van Jesus Christus (Hand.10:42; Rom.14:9-10; 1:11; 2Pet.2:4).

9. Ons glo dat Jesus Christus deur die werk van die Heilige Gees vir Hom ewige volk uit die ganse mensdom versamel, ongeag ras, geslag of stand. Elkeen wat hieraan deel het, toon die egtheid daarvan deur volhardende gehoorsaamheid aan Hom (Joh.17:2-5; 2Kor.5:18-19; 1Pet.1:3-4; Joh.1:12-13; 1Kor.2:6-16; 1Joh.5:1).

10. Ons glo in die Heilige Gees. Hy het op die Pinksterdag as Parakleet (Trooster / Voorspraak / Helper) vanaf die Vader en die Seun na die Nuwe Testamentiese gemeente gekom. Sedertdien woon Hy in alle ware gelowiges om die Seun se Middelaarswerk en regering in hulle te verwerklik. Sodoende verheerlik Hy Jesus Christus in en deur gelowiges en is Hy die waarborg dat hulle hul volle erfenis as God se kinders uiteindelik sal ontvang. Hy lei elkeen van hulle, sonder opheffing van hul verantwoordelikheid of gehoorsaamheidsvolharding, na die finale afronding van hul verlossing d.m.v. die Woord en die genademiddele wat daarmee saamhang. Sonder Sy wederbarende verligtende, versekerende, heiligmakende en toerustende werk is ware Christenskap en kerkwees totaal onmoontlik (Hand.2:39; Rom.8:9, 14, 17, 23, 26; Luk.11:13; Ef.1:13-14; 4:30; 5:18-21; 1Kor.12:4-11; 12-13; 2Kor.3:18; Kol.3:10; Joh.14:16-18, 26; Gal.5:16-26; 1Tes.5:19).

11. Ons glo in die liggaamlike opstanding uit die dood van alle mense – diegene wat in Christus gesterf het om deel te hê aan die ewige saligheid en die res om deel te hê aan die ewige verdoemenis (Rom.1:4; 4:25; 6:5; 1Pet.1:3; 1Kor.15:12-21, 20-21; Matt.27:53; Hand.1:21; 2:31; 3:21).

12. Ons glo dat Jesus Christus alle ware gelowiges (en net hulle) beveel om Hom van plek tot plek gesamentlik in gemeenteverband te dien volgens die riglyne wat Hy daarvoor in die Skrif neerlê, Elke gelowige is dus verantwoordelik om hom, indien enigsins moontlik, by ’n gemeente te voeg waar die Here in gees en waarheid gedien word; om hom aan die broers en susters toe te wy; en om hom aan die gepaardgaande dissipline te onderwerp. So ’n plaaslike gemeente staan slegs onder die gesag van Jesus Christus, maar benodig tog vir sy welsyn gemeenskap met ander gemeentes waar die Here ook in gees en waarheid gedien word (Hand.2:42-47; 20:7; Ps.119:148; Matt.6:6; 18:15-20; 1Kor.12:12-27; Ps.84; Hebr.10:25; Rom.1:7; Ef.1:20-22).

13. Ons glo dat Jesus Christus die Doop en die Nagmaal ingestel het en dat dit deur alle ware gelowiges (en net hulle) in gehoorsaamheid en as belydenis onderhou moet word as heenwysing na die mees basiese aspekte van hulle geloof en verlossing. Die Doop is die onderdompeling van die gelowige in water as belydenis van sy identifisering met Jesus Christus in Sy dood, begrafnis en opstanding. Die Nagmaal is die deelname aan die brood en die beker wat wys op Jesus Christus se versoeningsoffer, naamlik Sy gebroke liggaam en gestorte bloed (Hand.2:37-41; 8:12-13, 36-38; 9:18; 10:47-48; 11:16; 15:9; 16:14-15, 31-34; 18:8; 19:3-5; 22:16; 1Pet.3:21; Rom.6:3-4; Gal.3:27; Kol.2:12; 1Pet.3:21; Hebr.9:25, 26, 28; 10:22; Matt.7:6; 15:9; 26:26-28; 28:19-20; Joh.3:23; 6:29, 35,47-58; 1Kor.10:1-2, 16, 17, 21; 11:23-29; 2Kor.6:14-15; Eks.20:4-5; ).

OPE BRIEF AAN DIE N.G. KERK

(Meer as 3000 kopiee van hierdie brief is uitgestuur na alle beskikbare E-Posadresse in die N.G. Kerk)

2012-05-04

Geagte Broeder

Na baie gebed en besinning rig ek hierdie brief aan u en ’n klompie ander broeders in die N.G. Kerk en vra dat u hierdie brief biddend sal lees en met ’n oop gemoed daarna sal kyk.

Ek is tans ’n predikant in die Vaaldriehoek Gereformeerde Baptistegemeente en het teologie studeer aan die Potchefstroomse Universiteit vir C.H.O. Voor ek voltyds in die bediening betrokke geraak het, was ek baie lank ’n onderwyser waarvan 12 jaar as skoolhoof. Ek en my vrou was ook baie jare lidmaat van die N.G. Kerk, maar is in 1984, toe die N.G. Kerk nog gestaan het op hul belydenisskrifte, onder sensuur geplaas en afgesny van ’n N.G.-gemeente in Ermelo omdat ons, nadat ons waarlik tot wedergeboorte gekom het, oortuig geraak het van die doop van gelowiges (die kredodoop) en ons laat doop het. Ons het deur die jare heen hegte vriendskapsbande met N.G.-lidmate gehad (en het nog steeds) – lidmate wat waarlik die Here Jesus Christus as Saligmaker navolg (beide "kredo- en paedodopers").

Ek glo met 'n gebroke hart dat 'n skokkende groot deel van die institusionele kerk van ons dag grootliks koers verloor het, in sekere gevalle selfs reddende geloof versaak het, en dringend nodig het om onverwyld en met hartstog terug te keer na die fundamentele geloofsvertrekpunte van die Reformasie: die Skrif alleen, genade alleen, Christus alleen, geloof alleen, die eer van God alleen. Ek onderskryf die histories-gerespekteerde en internasionaal-erkende 1689 Baptiste Belydenis - soos meeste reformatoriese (gereformeerde) Baptiste oor die wêreld heen, asook die Belydenisskrif en Kernwaardes van Sola 5, 'n assosiasie van Godgesentreerde evangeliese gemeentes en gelowiges in (tans) agt lande in Suider-Afrika

Waarom rig ek hierdie brief aan u? Die afgelope jaar of drie, maar veral die afgelope jaar het ek intens bewus geraak van ernstige dwaalleer wat posgevat het in die N.G. Kerk en ek is intens besorg oor broers en susters in die Here Jesus Christus wat in die N.G. Kerk is. Ek kry van tyd tot tyd te doen met predikante in u denominasie en ek ervaar intense bekommernis en selfs verwarring by van hulle (veral jongeres).

Ek het ook bevriend geraak met heelwat N.G.-lidmate en ’n paar predikante op "Facebook" en kon ek sommige van die debatte wat gevoer word tussen regsinnige lidmate en –predikante aan die eenkant en "nuwe hervormers"/"verligtes"/"liberales"/"vrydenkers" aan die anderkant. My simpatie met die "behoudendes" aan die eenkant en my skok en ontnugtering in predikante wat in my oë bykans niks meer van die Woord van God glo nie, het a.g.v. hierdie debatte, net nog verder verdiep.

Wat ek nie kan verstaan nie, is dat die N.G. Kerk oënskynlik die wil en vermoë verloor het om op te tree teen teoloë, ampsdraers en predikante wat nie meer volgens die Belydenisskrifte en die Woord van God optree nie en derhalwe in my oë dwaalleraars geword het (Openb.2:14-15; 1 Tes.5:14; 2 Tim.4:2-5; Deut.13:5; 1 Kor.5:11, 13; Titus 1:9; e.a.). In die lig van Ferdie Mulder se boek, asook dit wat ek in die pers, persoonlike Blogs en "Facebook" lees, kan ek nie anders as om te dink dat die gesagstrukture van die N.G. Kerk reeds deur die "nuwe hervormers" gekaap is en daarom dat niks gedoen word aan persone/lidmate wat die Kerk van die Here Jesus Christus intens skade berokken nie.

Ek kan bv. nie verstaan hoe ’n persoon soos Jean Oosthuizen steeds maar net toegelaat word in sy posisie by die Kerkbode, terwyl hy blatant voortgaan om mense (insluitende myself) te belaster, te beledig, te verkleineer en geen standpunt inneem teen dwaalleer nie – hy maak ’n openlike bespotting van God Drie-Enig, ens. (Titus 1:16; e.a.). Hy gebruik baie dikwels kru taal teenoor mense wat opgevoede heidene nie eens sal gebruik nie (’n voorbeeld van een van die "Facebook" drade wat hierdie feite bevestig kan op versoek verskaf word) en dan praat ek nie eens van sy persoonlike "Facebook-muur" nie! Christene wat sterk van hom op Facebook verskil, word summier geblok, maar ateïste word ‘n vry hand gegee om God te laster. Dit lyk na ‘n eensydige skending van spraakvryheid.

Ek staan verstom en geskok oor sommige predikante se uitsprake oor die hel (wat kwansuis nie bestaan nie – Matt.5:22; Mark.9:47-48; 1 Tim.1:19-20; e.a.); die feit dat Satan nie ’n werklikheid is nie (Jak.4:7; 1 Pet.5:8; e.a.); geen sondeval nie (Gen.3; 1 Joh.1:6, 8; e.a.); dat Jesus nie uit ’n maagd gebore is nie (Matt.1:18; Luk.1:34; e.a.); die feit dat Christus nie uit die dood opgestaan het nie (Luk.24:36; Joh.20:27; e.a.); dat Jesus Christus nie aan die regterhand van God die Vader sit nie (Mark.16:19; e.a.); die skepping; Jona en Noag wat mitologiese verhale is; uitsprake wat positief is oor die "emergent church", panenteïsme, homoseksualitiet, ens. ens. My vraag is, hoe die N.G. Kerk steeds kan toelaat dat die gewone lidmaat (geredde en soekendes) wat op soek is na ’n ware en intieme verhouding met Jesus Christus en groei in heiligmaking, blootgestel kan word aan sulke predikante en selfs ’n moderator? Manne soos Nelus Niemandt; ’n Albert Cruywagen; Gerhard Bothma; Ben du Toit en talle teologiese professore en andere? Ek wil nie eers kommentaar lewer op sommige sinodale besluite nie.

Ek wil nie eers kommentaar lewer op sommige werklik-ontstellende Algemene Sinode- besluite nie.

Aan die begin van hierdie jaar, toe ek ook Ferdie Mulder se boek "Opgestaan" gelees het, is dit wat ek ervaar, gehoor, gelees en vermoed het, opnuut bevestig en het ek net nog meer intens bewus geraak van wat in die N.G.K. aan die gang is en wat sommige van u as predikante, studente en talle lidmate moet ervaar. My hart het al meer begin pyn vir regsinnige (gereformeerde) broers en susters in die N.G. Kerk en het ek net nog dieper bewus geraak van die nood; die paniek; die verwarring; die pyn; ens. wat besig is om pos te vat by diesulkes. Ek is veral ook intens bekommerd oor "onskuldige" kinders wat "losgelaat" word in van die teologiese fakulteite waar N.G. predikante opgelei word.

Ek en ons gemeente is tans deel van "SOLA 5", ’n assosiasie van Evangeliese Christene in Suidelike Afrika en ek dien ook tans op die hoofbestuur van "SOLA 5". Die meeste van die predikante wat deel uitmaak van "SOLA 5" is Engelssprekende broers in die Here en hulle wil gedurig van my weet wat aan die gang is in Afrikaanse kerklike geledere en hoe ek dit sien. Ek self vra my daagliks die vraag af: Wat gaan hier aan? Wat kan ons doen – wat kan ek doen? Dit gaan tog immers hier oor die eer van God en die waarheid!

Die Skrif roep ons ernstig op om te waak teen dwaalleer, omdat dit mense weglei van die geopenbaarde waarhede. Dit is nie ‘n saak wat enige Christen by hom kan laat verbygaan nie (2 Pet.2:1-2; Titus 1:7-11; 2 Tes.2:15; e.a.).

My broeder in Christus, ek is intens bekommerd oor die Kerk in Suid-Afrika in die algemeen en dan spesifiek oor wat aan die gang is in die N.G. Kerk en ek bid dat die Here sal ingryp en Sy eer sal herstel. Ek wens so dat ek hande kon vat met u in hierdie stryd op vergaderings, forums, sinodes, ens., maar omdat ek nie lidmaat van die NGK is nie, kan ek nie en kan ek u maar net verseker van my voorbidding en dat ek waar moontlik my bydrae sal lewer.

Sterkte in die stryd – ek dink aan u!

U broeder in Christus Jesus.

Kobus van der Walt